काठमाडौं । सरकारले फागुन १३ गतेदेखि देशभर दादुरा–रुबेला विरुद्धको खोप अभियान सञ्चालन गर्ने भएको छ । नियमित खोप लगाउन छुटेका पाँच वर्षमुनिका बालबालिकालकाई पनि सोही अभियानमा खोप दिइने स्वास्थ्य तथा जनसंख्या मन्त्रालयले जनाएको छ ।

खोप गाउँ र टोलस्तरमा नै दिइने छ । खोप लगाउने उमेर समूह र स्थानबारे सामुदायिक स्वास्थ्य स्वयंसेविका वा वडा कार्यालयमा सम्पर्क राख्न सकिने छ । 

अभियान चैत ७ गतेसम्म चल्ने छ ।

यसकारण लगाउनैपर्छ दादुरा–रुबेलाको खोप

विश्व स्वास्थ्य संगठन (डब्लूएचओ)ले दादुरा–रुबेलालाई अति संक्रामक र प्राणघातक रोगको रूपमा वर्गीकृत गरेको छ । बर्सेनि करिब ९० लाख बालबालिकामा दादुरा संक्रमण हुने गरेको र एकलाख ३६ हजारले ज्यान गुमाउने गरेको डब्लूएचओ र सेन्टर फर डिजिज कन्ट्रोल एन्ड प्रिभेन्सन (सीडीसी)को पछिल्लो रिापेर्टले देखाएको छ । जसमा सबैभन्दा धेरै पाँचवर्ष मुनिका बालबालिका छन् ।

गत वर्ष काठमाडौंसहित १७ जिल्लामा फैलिएको दादुराका कारण एक हजार बढी संक्रमित भएका थिए । 

सरकारले दादुराविरुद्धको खोपलाई नियमित खोप कार्यक्रममा राखेको छ । जन्मिएको ९ महिना र १५ महिनामा गरी दुईपटक यो खोप लगाउनुपर्छ ।

एकजना संक्रमितले १८ जनासम्मलाई सार्न सक्ने भएकाले खोप लगाउनु नै दादुराबाट बच्ने प्रमुख उपाय हो ।

नेपाल जनसंख्याख्यिक तथा स्वास्थ्य सर्वेक्षण (एनडीएचएस) २०२२ को प्रतिवेदनले जन्मिएको २३ महिनाभित्र पूर्ण खोप पाउने बालाबालिकाको दर अपेक्षाकृतरूपमा सुधार नभएको देखाएको छ । पूर्ण खोप नपाउने बालाबालिकाको दर २५ प्रतिशत रहेको प्रतिवेदनमा उल्लेख छ ।