![कांग्रेस महासमिति बैठक : ५६ पृष्ठको नीति प्रस्ताव प्रस्तुत हुने](https://12khari.top/uploads/posts/Congress_Pressmeet-1707911627.jpg)
काठमाडौं । सत्तारूढ दल नेपाली कांग्रेसले ‘राजनीतिक स्थायित्व, रूपान्तरण र नवीनता, स्वतन्त्रता न्याय र समानता, नेपाली कांग्रेसको नीतिगत प्रतिबद्धता’ भन्ने नाराका साथ महासमिति बैठक सम्पन्न गर्ने भएको छ ।
फागुन ७ देखि १० गतेसम्म ललिपुरको गोदावारीमा महासमिति बैठक हुनेछ । बैठकको सम्पूर्ण तयारी अन्तिम चरणमा पुगेको पार्टी प्रचार विभाग प्रमुख मीन विश्वकर्माले जानकारी दिए ।
बुधबार पार्टी मुख्य कार्यालय सानेपामा पत्रकार सम्मेलन गर्दै विश्वकर्माले आर्थिक, सामाजिक, धार्मिक, साँस्कृतिक तथा राजनीतिक विषय समेटिएको करिब ५६ पृष्ठको नीति प्रस्ताव महासमितिमा पेस हुने बताए ।
“नीति अधिवेशनको रूपमा सम्पन्न हुने यो महासमितिको बैठकमा प्रस्तुत हुने आर्थिक, सामाजिक, धार्मिक साँस्कृतिक तथा राजनीतिक विषय समेटिएको करिब ५६ पेजको नीति प्रस्ताव हुनेछ,” विश्वकर्माले भने । यो प्रस्ताव उपसभापति पूर्णबहादुर खड्काले प्रस्तुत गर्नेछन् ।
महासमिति बैठकमा महामन्त्रीहरूद्वयको तर्फबाट सांगठनिक र समसामयिक राजनीतिक प्रतिवेदनले पेस गरिने पनि उनले पत्रकार सम्मेलनमार्फत जानकारी दिए । “वर्तमान राजनीतिक परिवेशलाई उचित सम्बोधन गर्दै व्यवस्था परिवर्तनका हरेक आन्दोलनमा सहभागी जनताहरूमाझ नेपाली कांग्रेसले नै जनताको अवस्था परिवर्तनका लागि विश्वासिलो र भरपर्दो गरी काम गर्दछ, भन्ने थप विश्वास दिलाउने छ,” विश्वकर्माले भने ।