काठमाडौं । कर्मचारी भएपछि जसरी पनि अकुत सम्पत्ति कमाउनुपर्छ भन्ने ‘शिक्षा’ले नेपाल ध्वस्त भएको सांसद चित्रबहादुर केसीले गुनासो गरेका छन् ।
प्रतिनिधिसभाअन्तर्गतको राज्यव्यस्था तथा सुशासन समितिको आइतबारको बैठकमा उनले नेतामा पनि कमाउनुपर्छ भन्ने मानसिकता हावी हुँदा देश ध्वस्त भएको उल्लेख गरे ।
राष्ट्रिय जनमोर्चाका अध्यक्ष समेत रहेका सांसद केसीले कुनै पनि देश ध्वस्त पार्नुपरे शिक्षा क्षेत्रलाई अस्तव्यस्त बनाइदिँदा पर्याप्त हुने भन्दै आक्रोश पोखे ।
“कुनै देशलाई ध्वस्त पार्नु छ भने शिक्षा ध्वस्त पारिदिनुपर्छ । हाम्रोमा कर्मचारी भएपछि जसरी पनि कमाउनुपर्छ, नेता भएपछि जसरी पनि कमाउनुपर्छ भन्ने शिक्षाले ध्वस्त पारिरहेको छ,” उनले भने ।
उनले कुनै एक कर्मचारीलाई कारबाही गरेर देशको हित नहुने भन्दै नेतृत्वको मानसिकता बदलिनुपर्ने र कानुनी सुधार गरिनुपर्ने धारणा राखे ।
सांसद केसीले नेपालीजतिलाई विदेश पठाउने र विदेशीलाई अंगीकृत नागरिकता दिँदा देश बन्छ ? भन्ने प्रश्न गरे ।
