काठमाडौं । प्रमुख प्रतिपक्ष दल नेकपा (एमाले)का सांसद रघुजी पन्तले भारतीय नागरिकलाई सिमा नाकामा कडाइ गर्नुपर्ने धारणा राखेका छन् । 

आइतबारको राज्यव्यवस्था तथा सुशासन समिति बैठकमा बोल्दै उनले भातरसँगको सिमा व्यवस्थित गर्नुपर्ने बताए । 

“खुल्ला सीमा व्यवस्थित गर्नुस् । भारतले हाम्रा नागरिकलाई कडाइ गर्दा हामी किन नसक्ने ?,” उनले भने । सांसद पन्तले नेपाल तेस्रो देशबाट आएर बसोबास गर्ने मानिसहरूको अखडा बन्दै गएकोमा पनि असन्तुष्टि पोखे । 

उनले रोहिङ्गा शरणार्थीको विषय पनि बैठकमा उठाए । “यथार्थ जानकारी होस् । भारतसँगको सीमा व्यवस्थित गर्नुस् । किन भने नेपाल जो पनि आएर बस्ने ठाउँ भयो,” सांसद पन्तले भने, “रोहिंगाको विषय प्रमाणसहित आइरहेको छ । तेस्रो लिंगीहरू जसले लुट्छन् । उनीहरू नेपाली होइनन् ।” 

यो मुलुकमा जो आएर जे पनि हुने हो ? भन्ने प्रश्न गर्दै उनले पाकिस्तानी महिला नेपालको बाटो प्रयोग गरेर भारत जादा हंगामा भएको पनि स्मरण गरे । “पाकिस्तानी महिला भारतीयसँग लभ पर्‍यो नेपाल हुँदै भारत पुगिन् । भारतमा हंगामा भयो,” उनले भने । 

उनले विमानस्थलमा देखिएको दृष्यले राष्ट्रिय अन्तर्राष्ट्रिय बेइज्जत भएको भन्दै प्रहरीलाई मात्र कारबाही भएको तर कर्मचारीलाई नभएको बताए । “जबकी कर्मचारीले हात हाल्न थालेको देखिन्छ,” उनले भने ।