काठमाडौं । सप्तरीको निर्वाचन क्षेत्र नम्बर–४ ‘ख’बाट प्रदेशसभा सदस्यमा निर्वाचित सांसद अनिरुद्वप्रसाद सिंह यादव जनता समाजवादी पार्टी (जसपा)मा फर्किएका छन् ।

शनिबार सप्तरीको बोदेवर्साइन नगरपालिकामा आयोजित कार्यक्रममा जसपाका अध्यक्ष उपेन्द्र यादवसहितका नेताले उनलाई पार्टीमा स्वागत गरे । उनीसँगै विभिन्न पार्टी परित्याग गरी केही नेता–कार्यकर्ता जसपामा प्रवेश गरेका अध्यक्ष यादवका स्वकीय सचिव महेश चौरसियाले जानकारी दिए ।

पछिल्लो निर्वाचनमा जसपाबाट टिकट नपाएपछि उनी स्वतन्त्र उमेदवार बनेका थिए । नौ हजार ९८५ मत प्राप्त गरी प्रदेशसभा सदस्यमा निर्वाचित भएका थिए । उनका निकटतम प्रतिद्वन्द्वी जसपाका उमेदवार अभिषेक यादवले सात हजार ९२० मत प्राप्त गरेका थिए ।

योसँगै मधेस प्रदेशसभामा जसपाका प्रदेशसभा सदस्य संख्या १९ पुगेको छ । यसअघि, महोत्तरी–२ ‘ख’बाट निर्वाचित स्वतन्त्र सांसद सुरिता साह र पर्सा–३ ‘क’बाट निर्वाचित स्वतन्त्र सांसद प्रमोदकुमार जैसवाल जसपामा प्रवेश गरेका थिए ।