काठमाडौं । कम्प्युटर एसोसिएसन नेपाल महासंघ (क्यान)ले माघ २५ देखि २९ गतेसम्म काठमाडौंमा २९औँ  संस्करणको ‘क्यान इन्फोटेक २०२४’ आयोजना गर्ने भएको छ ।

क्यान महासंघले बिहीबार एक कार्यक्रममार्फत इन्फोटेकको तयारीबारे जानकारी दिएको हो ।

२९औँ क्यान इन्फोटेकको मुख्य प्रायोजकमा एस पावर बीपीई प्राइभेट लिमिटेड र सह–प्रायोजकमा एचएमसी दहुआ रहेको छ ।

प्रविधि क्षेत्रमा भइरहेको विकास र विस्तारलाई क्यान इन्फोटेकले झल्काउने र इन्फोटेकले डिजिटल नेपाल निर्माणमा सहयोग पु-याउने क्यान महासंघका अध्यक्ष रणजीत पोदारको भनाइ छ ।

क्यानका महासचिव चिरञ्जीवी अधिकारीले क्यान इन्फोटेकमा स्टार्टअप, युवा प्रतिभा, नवप्रवर्तन तथा नेपाली उत्पादनलाई विशेष प्राथमिकता दिइएको बताए ।

क्यान इन्फोटेकको टिकेटिङ पार्टनर ईसेवामार्फत टिकट खरिद गर्न सकिने आयोजकले जनाएको छ ।

सर्वसाधारणका लागि १०० रुपैयाँ र विद्यार्थीका लागि टिकट शुल्क ५० रुपैयाँ तोकिएको छ ।

जेष्ठ नगरिक, फरक क्षमताका नागरिक, दश वर्ष मुनिका बालबालिका तथा सरकारी र सामुदायिक विद्यालयको सिफारिसमा सामूहिक अवलोकनका लागि निःशुल्क प्रवेशको व्यवस्था गरिएको क्यानले जनाएको छ ।

क्यान महासंघ नेपालले विगत ६ वर्षयता लर्ड बुद्ध एजुकेसन फाउन्डेसनसँगको सहकार्यमा नेपालभरका जेहेन्दार तथा विपन्न विद्यार्थीहरूलाई बीएस्सी आईटी डिग्रीका लागि प्रत्येक वर्ष दुई करोड रुपैयाँ बराबरको छात्रवृत्ति प्रदान गर्दै आएको र यस वर्ष पनि निरन्तरता रहने जनाएको छ ।

इन्फोटेकमा नेपाल रोबोटिक्स एकेडेमीले विकास गरेको जेनेरेटिभ एआई सिस्टम ‘कान्छी’ रोबटको बेटा संस्करण सार्वजनिक गरिने भएको छ ।

इन्फोटेकमा एनपी सर्ट र सीएसआरआईको पहलमा साइबर सेक्युरिटी हेल्प डेस्क समेत सञ्चालन गरिने बताइएको छ ।

सूचना तथा सञ्चार प्रविधि प्रदर्शनीमा क्यान महासंघका सदस्य संस्थाहरूका साथै विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धी कम्पनीहरूको सहभागिता रहने क्यानले जनाएको छ ।