काठमाडौं । साउदी अरेबियालाई पेनाल्टी सुटआउटमा हराउँदै दक्षिण कोरिया एएफसी एसियन कपको क्वार्टरफाइनलमा प्रवेश गरेको छ । 

मंगलबार राति कतारको एजुकेसन सिटी रंगशालामा सम्पन्न खेलको निर्धारित र अतिरिक्त समय १–१ को बराबरीमा सकिएपछि नतिजाको निर्णय पेनाल्टीबाट भएको थियो । 

पेनाल्टीमा दक्षिण कोरियाले ४–२ ले बाजी मार्दै प्रतियोगिताको अन्तिम–८ मा स्थान सुनिश्चित गरेको हो । पेनाल्टीमा दक्षिण कोरियाबाट प्रहारका लागि आएका सन ह्युङ मिन, किम योङ ग्वेन, चो ग्यु–सङ र ह्वा हि–चान गरी चारै जनाले गोल गरे ।

साउदीबाट प्रहारका लागि आएका मोहमेद कानो र साउद अब्दुलहमिदले गोल गर्दा समि अल–नाजेइ र अब्दुलरहमान घरिबको प्रहार भने दक्षिण कोरियाका गोलकिपरले विफल बनाइदिएका थिए ।

त्यसअघि खेलमा अग्रता भने साउदी अरेबियाले बनाएको थियो । ४६औं मिनेटमा अब्दुल्लाह रदिफले गोल गर्दै साउदीलाई अग्रतामा राखेका थिए । तर, इन्जुरी समयको अन्तिम मिनेटमा चो ग्यु–सङले गोल फर्काएपछि कोरिया खेलमा फर्कियो । 

दक्षिण कोरियाले अब सेमिफाइनल प्रवेशका लागि अस्ट्रेलियाविरुद्ध खेल्नेछ । यी दुई टिमबीचको खेल फेब्रुअरी २ मा हुनेछ ।

मंगलबार राति नै भएको अर्को खेलमा जित निकाल्दै उज्वेकिस्तान प्रतियोगिताको क्वार्टरफाइनलमा प्रवेश गरेको छ । कतारको अल जनौब रंगशालामा भएको खेलमा उज्वेकिस्तानले थाइल्यान्डलाई २–१ ले हराएको हो ।

उज्वेकिस्तानले अब सेमिफाइनल प्रवेशका लागि साविक विजेता कतारसँग खेल्नेछ ।