काठमाडौं । उद्योग, वाणिज्य तथा आपूर्तिमन्त्री रमेश रिजालले उपभोग्य वस्तुको ‘लेभलिङ’ स्पष्ट रूपमा हुनुपर्ने बताएका छन् । सोमबार कृषि, सहकारी तथा प्राकृतिक स्रोत समितिको बैठकमा उनले यस्तो बताएका हुन् ।

उनले उपभोग्य वस्तुको ‘ब्रान्डिङ’ र ‘लेभलिङ’ स्पष्ट रूपमा हुनुपर्ने उल्लेख गरे । वस्तुको म्याद नाघ्ने मिति ठूल्ठूला अक्षरमा स्पष्ट रूपमा देखिनुपर्ने उनले बताए ।

“सानास्तरमा घुम्ती व्यवसायहरू स्थानीय तहले दर्ता गर्दछ । दर्ता पनि भइरहेका छन् । बजार अनुगमनको विषयमा स्थानीय तह पनि भएको कारणले सजायको विषय पनि स्थानीय तहले आफ्नो लेभल जति छ गर्नुपर्ने, उहाँहरूले नै सजायको लेभल तोकिदिए राम्रो हुन्छ,” उनले भने, “वस्तुहरूको लेभलिङको विषय, ब्रान्डिङको विषय यहाँहरूले उठाउनुपर्छ । त्यो हुनुपर्छ भन्ने मेरो मान्यता हो । हाम्रो मन्त्रालयको मान्यता हो ।”

मन्त्री रिजालले उद्योग दर्ता, खाद्य प्रशोधन, बजार अनुगमन र उत्पादित वस्तुको गुणस्तर नियमनका विषयमा उद्योग, वाणिज्य तथा आपूर्ति मन्त्रालय र कृषि तथा पशुपन्छी विकास मन्त्रालयबीचमा समन्वय हुन आवश्यक रहेको बताए । न्युज एजेन्सी नेपाल