काठमाडौं । प्रतिनिधिसभाका सभामुख देवराज घिमिरेले संघीयतालाई सही ढंगबाट प्रयोग गर्न सक्नुपर्ने बताएका छन् । शनिबार मकवानपुरको भीमफेदी गाउँपालिकाले आयोजना गरेको एक कार्यक्रममा उनले यस्तो बताएका हुन् ।
उनले संघीयता नेपालजस्तो मुलुकमा जरुरी थिएन भन्ने कुरा धेरै चर्चामा आइरहेको उल्लेख गरे । संघीयता खर्चको बोझ मात्र भएको र यसले राष्ट्रमा उन्नति नभएको भन्ने विरोध र टिप्पणी हुने गरेको उनले बताए । संघीयतालाई सही ढंगामा उपयोग गरिनुपर्नेमा उनले जोड दिए ।
“खासगरी संघीयता नेपालजस्तो मुलुकमा जरुरी थिएन भन्ने कुराहरू धेरै चर्चामा आइरहेको छ । खर्चको बोझ मात्रै भएको छ र संघीयताले राष्ट्रमा उन्नति गर्न सकेन भन्ने विरोध र टिप्पणीसँगसँगै संविधानमाथि टिप्पणी हुने गरेको छ,” उनले भने, “वास्तवमा संघीयतालाई प्रयोग गर्ने हो भनेदेखि यसले ठूलाठूला कामहरू गर्न सक्छ । त्यसैले हाम्रो गाउँघरको उखान छ– जहाँ इच्छा त्यहाँ उपाय । यदि, इच्छा गर्ने हो भने केही न केही उपाय आउन सक्छन् ।”
सभामुख घिमिरेले सामाजिक सुरक्षासम्बन्धी कानुन कार्यान्वयन गर्न आवश्यक रहेको औँल्याए । न्युज एजेन्सी नेपाल
