काठमाडौं । सत्तारुढ दल नेपाली कांग्रेसका सांसद प्रदीप पौडेलले विश्वविद्यालयलाई राजनीतिक भागबन्डाका आधारमा चलाउनु नहुने बताएका छन् । 

शुक्रबार नेपाल विद्यार्थी संघले काठमाडौंमा आयोजना गरेको प्रशिक्षण कार्यक्रममा बोल्दै सांसद पौडेलले विश्व विद्यालय कुनै राजनीतिक दलको भागबन्डाको आधारमा चलाउनु गलत भएको बताए । उनले विश्वविद्यालयको स्वच्छ प्रतिस्पर्धाको आधारमा सरकारले नियुक्त गर्नुपर्नेमा जोड दिए । 

उनले विश्वविद्यालयको वर्तमान अवस्थालाई सम्हाल्न सक्ने र बुझ्नसक्ने एवं विश्वविद्यालयमा सुशासन कायम राख्नसक्ने व्यक्तिलाई सरकारले छनोट गर्न आवश्यक रहेको बताए । उच्च शिक्षा अध्ययनको विषय राज्यको प्राथमिकतामा पर्न छोडेको उनको भनाइ थियो ।

उनले भने, "विश्व विद्यालयलाई राजनीतिक भागबन्डाका आधारमा अगाडि बढाउनु हुँदैन । विश्व विद्यालय कसले राम्रोसँग अगाडि बढाउन सक्छ । विश्व विद्यालयमा सुशासन कसले कायम राख्नसक्छ त्यसका आधारमा विश्वविद्यालयको उपकुलपति नियुक्त गर्नुपर्छ । उच्च शिक्षा अध्ययनको विषय नै राज्यको प्राथमिकतामा पर्दैन भने देशले उन्नति गर्न सक्दैन । नेपाललाई आवश्यक पर्ने कुन क्षेत्रको जनशक्ति कति हो त्यसको बारेमा पनि सरकार प्रष्ट छैन ।" 

उनले सरकारले दिएको शिक्षा मुलुकको स्रोत र आर्थिक समृद्धिसँग नजोडिएको बताए ।