काठमाडौं । अर्थतन्त्रको ऐनाको रूपमा मानिने ‘स्टक मार्केट’ उकालो गतिमा छ ।  १८ सयको विन्दुमा झरेको बजार अहिले बढेर २२ सय विन्दु नजिक पुगेको छ । 

बुधबारको कारोबारमा बजार २२१५ विन्दुसम्म पुगेको थियो ।  तर, अन्तिममा बजार घटेर २१६३ विन्दुमा बन्द भएको थियो । कारोबार अवधिभरिमा बजार घटेर २१५४ विन्दुसम्म झरेको थियो । तर कारोबार रकम भने दुई वर्षयताकै बढी रहेको छ ।

यसअघि २०७८ भदौ २१ गते नौ अर्ब ८२ करोड रुपैयाँको सेयर कारोबार भएको थियो ।  त्यसयता पहिलोपटक बुधबार नौ अर्ब ७६ करोड रुपैयाँको सेयर कारोबार भएको हो । २०७८ भदौ २ गते हालसम्मकै उच्च विन्दु ३२ सयमा पुग्दा कारोबार रकम पनि उच्च नै थियो । 

हालसम्मकै सबैभन्दा उच्च कारोबार २०७८ साउन ३१ गते भएको थियो ।  सो दिन २१ अर्ब ६४ करोड ७६ लाख रुपैयाँको सेयर कारोबार भएको थियो । उच्च मूल्यको कारोबार भएको दुई दिनपछि भदौ २ गते बजार उच्च  विन्दुमा पुगेको थियो ।

त्यसयता बजारमा उतारचढाव आयो र उक्त विन्दु पार गर्न सकेको छैन ।  अहिले बजार २२ विन्दुको परीक्षणकालमा छ । यो विन्दुमा टिक्न सके बजार उकालो लाग्ने शेयर बजार विश्लेषक सुवासचन्द्र ढुंगाना बताउँछन् ।

२२ सय विन्दु पुगेपछि अधिकांशले बिक्री गर्ने मनस्थिति बनाएका हुन सक्ने उनले बताए ।  त्यसले पनि बजारलाई प्रभाव पार्न सक्ने उनको भनाइ छ । 

“आजको कारोबारमा प्रफिट बुक गरेको देखियो । २२ सय विन्दु माथिसम्म पुगेको बजारमा केही करेक्सन देखिएको हो । बजार कता जान्छ भनेर अब भोलिको करोबारले देखाउँछ,” उनले भने, “बिहीबार २१५० विन्दुभन्दा तल आएन र माथि फर्कियो भने बजारले लय समातेको भन्ने बुझिन्छ ।”

त्यस्तै बजारले २२ सय विन्दुमा परीक्षण गरेको पाँचौंपटक गरेको लगानीकर्ताहरु बताउँछन् । लगानीकर्ता शिवचन्द्र सामाजिक सञ्जालमा लेख्दै बजार २२ सय विन्दुमा ठोकिन आएको बताउँछन् । 

“पाँचौँपटक हामी २२ सयको पर्खालमा ठोक्किन आइपुगेका छौं । यो पटक पनि कतिपय लगानीकर्तालाई अब फेरि १८ सयमै पुगिने त हैन भन्ने त्रास रहेको छ । जहाँसम्म लाग्छ यो पटक २२ सयको पर्खाल भत्किनेछ । कारण अहिले परिस्थिति एकदमै फरक र बजारमैत्री रहेको छ,” उनले लेखेका छन् ।

नेपाल स्टक एक्सचेन्जका अनुसार एक वर्षको अवधिमा यसअघि २०२३ जनवरी १८ मा २२१४ विन्दुसम्म पुगेको थियो ।त्यसपछि जनवरी २६ मा २२०१ विन्दु, फेब्रुअरी ८ मा २२१३ र जुलाइ २४ मा बजार २२ सय विन्दुमा पुगेको थियो ।  

त्यसैगरी बजारमा अहिले सकारात्मक माहोल रहेको लगानीकर्ता दिपेन्द्र अग्रवाल बताउँछन् । केही समयमा नै कारोबारले नयाँ रेकर्ड बनाउने उनको भनाइ छ । 

“बजारमा अहिले सकारात्मक समाचार छन् । धितोपत्र बोर्डको अध्यक्ष हमाल हुँदा भन्दा अहिले माहोल राम्रो छ । राष्ट्र बैंकले पनि खुकुलो नीति लिएको छ । बैंकहरूले ब्याजदर घटाएका छन्,” उनले भने, “आजको कारोबार त एउटा प्रस्थानविन्दु मात्र हो । कारोबार रकमले नयाँ उचाई चुम्छ ।”

पहिले २२ सय विन्दु पुगेर बजार १८ सय विन्दुमा झर्दा हरेक कुराले आर्थिक सूचक नकारात्मक रहेको पनि लगानीकर्ताको बुझाइ छ । 

बैंकहरूले सेयर कर्जा बढाएकाले पनि अब बजारमा ठूला लगानीकर्ता प्रवेश गरेको प्रष्ट देखिएको बुझाइ छ । बुधबारको बजारलाई धेरैले करेक्सनको रूपमा लिएका छन् ।  लगातार उच्च अंकले बढेको बजार सामान्य अंक घट्नु स्वाभाविक रहेको पनि लगानीकर्ताको बुझाइ छ ।