काठमाडौं । विद्यालय शिक्षा विधेयकमा राष्ट्रिय परीक्षा बोर्डको अध्यक्ष नियुक्ति प्रक्रिया सही नभएको भन्दै राष्ट्रिय परीक्षा बोर्डले आपत्ति जनाएको छ । 

संघीय संसद्मा रहेको विधेयकमा बोर्ड अध्यक्ष नियुक्ति गर्न राष्ट्रिय योजना आयोगको शिक्षा हेर्ने सदस्यको संयोजकत्वमा समिति बन्ने उल्लेख छ । यसले बोर्डमा राजनीतिकरण बढाउने भयमा बोर्ड पुगेको छ । राष्ट्रिय परीक्षा बोर्डका अध्यक्ष डा. महाश्रम शर्माले विधेयकको प्रावधन हेर्दा वोर्डको स्वायत्ता हराएर राजनीतिकरण हुने देखिएको बताए । 

बिहीबार प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समिति बैठकमा विद्यालय शिक्षा विधेयकमाथिको छलफलमा बोल्दै उनले बोर्डको अध्यक्ष नियुक्ति पुरानै शैलीमा हुनुपर्ने बताए । 

समितिमा रहेको विधेयकमा ‘बोर्डको अध्यक्षको नियुक्तिको लागि राष्ट्रिय योजना आयोगको शिक्षा क्षेत्र हेर्ने सदस्यको संयोजकत्वमा मन्त्रालयको सचिव र ख्यातिप्राप्त शिक्षाविद्हरू मध्येबाट मन्त्रालयले मनोनीत गरेको एक महिलासहितको तीन सदस्यीय सिफारिस समिति गठन हुनेछ र सो समितिले सिफारिस गरेको व्यक्तिलाई नेपाल सरकारले बोर्डको अध्यक्षमा नियुक्ति गर्नेछ’ भनि लेखिएको छ । 

यो गलत प्रक्रिया भएको उनले बैठकमा जानकारी गराए । “यो विधेयकले समिति र समितिले गर्ने कामलाई राजनीतिकरण खोजेको हो । राष्ट्रिय योजना आयोगको सदस्य भनेको पोलोटिकल व्यक्ति हुन्छ । त्यसैले राजनीतिक व्यक्तिको नेतृत्व भन्दा लोकसेवा आयोगको अध्यक्षकै नेतृत्वमा बोर्ड अध्यक्ष चयन हुनुपर्छ,” उनले भने । 

हाल बोर्डको अध्यक्ष सिफारिस लोकसेवा आयोगको अध्यक्षको संयोजकत्वमा रहने समितिले गर्ने प्रावधान रहेको उनले जानकारी दिए ।