काठमाडौं । दक्षिण अफ्रिकाविरुद्धको दोस्रो टेस्टमा पाहुना टिम भारतले सात विकेटको सहज जित निकालेको छ । दक्षिण अफ्रिकाको केप टाउनमा भारतले घरेलु टिमविरुद्ध टेस्ट क्रिकेटमा निकालेको यो पहिलो जित हो ।
दोस्रो टेस्टको दोस्रो दिन भारतले ७९ रनको लक्ष्य पाएको थियो । जसलाई पाहुना टिमले तीन विकेट गुमाएर पूरा गर्यो । यो जितसँगै भारतले दक्षिण अफ्रिकासँगको दुई खेलको टेस्ट शृंखला १–१ को बराबरीमा अन्त्य गरेको छ । भारतले सन् २०१०–११ पछि पहिलो पटक दक्षिण अफ्रिकामा टेस्ट शृंखला बराबरीमा टुंग्याएको हो ।
दोस्रो दिनको दोस्रो इनिङमा भारतका ओपनर यशस्वी जयसवालले २८ रन बनाए । कप्तान रोहित शर्मा १६ रनमा अविजित रहँदा विराट कोहलीले १२ र सुभमन गिलले १० रन थपे ।
दक्षिण अफ्रिकाका कगिसो रबाडा, नान्द्रे बर्जर र मार्को जान्सेनले एक–एक विकेट लिए ।
केप टाउनस्थित न्युल्यान्ड्समा जारी टेस्टको दोस्रो दिन दोस्रो इनिङ्समा दक्षिण अफ्रिकाले ६२–३ बाट ब्याटिङ सुरु गरेको थियो । तर, दोस्रो दिनको पहिलो सेसनमा दक्षिण अफ्रिकाले थप ११४ रन जोड्दा बाँकी सात विकेट गुमाएको हो ।
दोस्रो इनिङमा दक्षिण अफ्रिकाका ओपनर आइदेन मार्करमले १०६ रन बनाए । यसबाहेक, कप्तान डिन एल्गरले १२ रन थप्दा डेविड बेडिङ्घम र मार्को जान्सेनले समान ११ रन जोडे । अन्यले भने दोहोरो अंकमा रन जोड्न सकेनन् ।
घरेलु टिमलाई सस्तैमा रोक्न भारतका जसप्रित बुमराहले ६ विकेट लिएका थिए । मुकेश कुमारले दुई विकेट लिँदा मोहम्मद सिराज र प्रसिद्ध कृष्णाले समान एक विकेट लिए ।
यसअघि पहिलो इनिङमा टस जितेर ब्याटिङमा आएको दक्षिण अफ्रिका ५५ रनमै समेटिएको थियो । भारतले भने पहिलो इनिङमा १५३ रन बनाएको थियो ।
टेस्ट शृंखलाको पहिलो खेलमा घरेलु टिमले भारतविरुद्ध एक इनिङ र ३२ रनको सहज जित निकालेको थियो ।
-1706524096.JPG)
