काठमाडौं । राष्ट्रपति रामचन्द्र पौडेलसँग भारतका विदेशमन्त्री एस जयशंकरले शिष्टाचार भेट गरेका छन् । बिहीबार बिहान राष्ट्रपति भवन शीतलनिवास पुगेर जयशंकरले राष्ट्रपति पौडेलसँग भेटवार्ता गरेका हुन् ।
भेटका अवसरमा राष्ट्रपति पौडेलले नेपाल–भारतबीच कनेक्टिभिटी, जलवायु परिवर्तन असरको न्यूनीकरण र जलविद्युत्को विकासमा सहकार्य आवश्यक रहेको बताए ।
राष्ट्रपतिका प्रेस सल्लाहकार किरण पोखरेलका अनुसार, राष्ट्रपति पौडेलले हिमाल र पानीको स्रोत बचाउने विषय नेपाल र भारतको साझा मुद्दा भएको भन्दै मिलेर काम गर्न आग्रह गरेका थिए ।
“कृषि, ऊर्जा शक्ति, पर्यटनको विकास र मानव संशाधन विकास नेपालका प्राथमिकतामा भएको र यसमा सहकार्यका लागि आग्रह गर्नुभएको छ,” पोखरेलले बाह्रखरीसित भने ।
विदेशमन्त्री जयशंकरले नेपालका सम्भावनाप्रति भारत जानकार रहेको भन्दै सबै क्षेत्रमा आफूहरूको निरन्तर सहयोग रहने बताएका थिए ।
नेपाल–भारत परराष्ट्रमन्त्रीस्तरीय संयुक्त आयोगको सातौँ बैठकमा सहभागी हुन उनी बिहीबारै काठमाडौं आइपुगेका हुन् ।
