काठमाडौं । पूर्वप्रधानमन्त्री झलनाथ खनालले काठमाडौंवासीलाई आवश्यक खानेपानी आपूर्ति गर्न सरकारसँग आग्रह गरेका छन् । मेलम्ची आयोजनाको पानी काठमाडौं उपत्यकामा छिटो वितरणको मागसहित सोमबार काठमाडौं उपत्यका खानेपानी लिमिटेड (केयूकेएल)मा ज्ञापनपत्र बुझाउँदै उनले यस्तो आग्रह गरेका हुन् ।

उनले काठमाडौंमा पानीको संकट दिनानुदिन बढेर गएको उल्लेख गरे । सरकारले पानीको आपूर्ति विस्तार गर्न नसक्दा समस्या झनै बढेर गएको उनले बताए ।

“पानीको आपूर्ति गर्ने कुरामा सरकारले गम्भीरतापूर्वक लिनुपर्छ, युद्धस्तरमा काम गर्नुपर्छ । केयूकेएलबाट सप्लाई भइरहेको पानीले हाम्रो आवश्यकता परिपूर्ति भइरहेको छैन,” उनले भने, “चाँडोभन्दा चाँडो मेलम्चीको पानी यसमा जोड्नुपर्ने हुन्छ । यो पुरानो सिस्टम थोत्रो भएको, नयाँ सिस्टम बनाइएको छ, जोडिएको छैन, जोडियोस् ।”

मान्छेले आफ्नो जीवन बचाउन नपाए जे गर्न पनि बाध्य हुने अवस्थालाई सरकारले बुझ्न जरुरी रहेको उनले बताए ।