काठमाडौं । नेपाली कांग्रेसका महामन्त्री गगन थापाले आफूहरूले ‘मिसन ०८४’ भन्न नपाउने बताएका छन् । कांग्रेसले तत्काल देखिने गरी काम गर्नुपर्ने र त्यसका आधारमा जनतासामु जानुपर्नेमा उनले जोड दिए ।

केन्द्रीय कार्यसमितिको शनिबारको बैठकमा आफ्नो धारणा राख्दै उनले नीति अधिवेशनबाट ‘मिसन गुणस्तरीय शिक्षा’, ‘मिसन सर्वसुलभ स्वास्थ्य’ र ‘मिसन मर्यादित रोजगारी’ तय गर्न प्रस्ताव गरे । यी विषय पूरा गरेर जनतामाझ जानुपर्ने उनले बताए ।

“अरू सबै दलसँग समय पनि छ, सुविधा पनि छ– अहिले भएन, हामी आउँछौँ र ठिक बनाउँछौँ भन्ने,” बैठकमा उनले भने, “तर, हामीले त्यो भन्न पाउँदैनौँ ।”

वर्तमान सरकारमा कांग्रेस सहभागी भएको आठ महिना भएको उनले उल्लेख गरे । उनले कांग्रेसका मन्त्रीले गरेका सकारात्मक कामको सूची पनि मागे ।

“सरकारमा कांग्रेस सहभागी भएको आठ महिना भयो । कांग्रेसका प्रत्येक मन्त्रीले आठ महिनामा गरेको यस्तो आठवटा कामको सूची दिनुस्, जसको कारणले नागरिकको जीवनमा सकारात्मक परिवर्तन आयो र ती काम तपाईं नभएको भए हुँदैन थियो,” महामन्त्री थापाको भनाइ उद्धृत गर्दै एक केन्द्रीय सदस्यले जानकारी दिए ।

उनले अब एक वर्षमा सरकारमा बसेर के गर्ने भन्ने लक्ष्य निर्धारण गर्न आग्रह गरे । “त्यो लक्ष्य पूरा गर्न भनेजस्तो काम गरेनन् भने मन्त्री फेरौँ,” थापाको प्रस्ताव छ ।

उनले पार्टी सभापति शेरबहादुर देउवालाई सचेत समेत गराएका छन् । हरेक विषयमा पार्टीभित्र समझदारी गर्नुपर्नेमा उनले जोड दिए ।

• देउवालाई गगनको चेतावनी

सत्ता गठबन्धनमा गरिने कतिपय निर्णयप्रति उनले असन्तुष्टि जनाए । पार्टीभित्र छलफल नगरी कांग्रेसको धारणा भनेर गरिने निर्णय मान्य नहुने उनले चेतावनी दिए ।

बैठकमा गगन थापाको भनाइ पढ्नोस्–
१. सरकारमा कांग्रेस सहभागी भएको आठ महिना भयो । कांग्रेसका प्रत्येक मन्त्रीले आठ महिनामा गरेको यस्तो आठवटा कामको सूची दिनुस्, जसको कारणले नागरिकको जीवनमा सकारात्मक परिवर्तन आयो र ती काम तपाईं नभएको भए हुँदैन थियो । अनि, तपाईंको ती कामको प्रचार कांग्रेसका तमाम सदस्यले गर्नेछन् ।

२. अब एक वर्षमा सरकारमा बसेर के गर्ने भन्ने लक्ष्य निर्धारण गरौँ । त्यो लक्ष्य पूरा गर्न भनेजस्तो काम गरेनन् भने मन्त्री फेरौँ ।

– अरू सबै दलसँग समय पनि छ, सुविधा पनि छ– अहिले भएन, हामी आउँछौँ र ठिक बनाउँछौँ भन्ने । तर, हामीले त्यो भन्न पाउँदैनौँ ।

– अरूले मिसन ०८४ भन्न पाउँछन्, तर हामीले भन्न पाउँदैनौँ । हामी छलफल गरौँ र नीति अधिवेशनबाट ‘मिसन गुणस्तरीय शिक्षा’, ‘मिसन सर्वसुलभ स्वास्थ्य’, ‘मिसन मर्यादित रोजगारी’ तय गरौँ । अनि, यी चार वर्षमा यी कुरा पूरा गरौँ । यसको आधारमा बल्ल जनतासामु जान पाइन्छ ।

३. गठबन्धन बैठक भन्ने अनि पार्टीभित्र सरसल्लाह, संवाद, समझदारी नगरी पार्टीको धारणा भनेर निर्णय गर्ने, त्यस्तो निर्णयको भारी निर्णय गर्ने एक्लैले बोक्नुपर्छ ।