विराटनगर । कोसी प्रदेशको राजधानी विराटनगरमा मोरङ व्यापार संघ एक्स्पो २०२३ सुरु भएको छ । प्रधानमन्त्री पुष्पकमल दाहाल ‘प्रचण्ड’ले शुक्रबार एक कार्यक्रमबीच एक्स्पोको उद्घाटन गरे ।

यही पुस १६ गतेसम्म चल्ने एक्स्पोमा औद्योगिक र कृषि उत्पादनसँग सम्बन्धित स्टल राखिएको छ । एक्स्पोमा पाकिस्तानको लेदर सामग्री बिक्रीकक्ष, बंगलादेशको गार्मेन्ट उद्योगका लत्ताकपडाको स्टल राखिएको छ ।

यस्तै, भारतको अत्याधुनिक कृषि प्रविधिमा उत्पादित सामग्रीको बिक्री स्टल र नेपालको हिमाल, पहाड र तराई–मधेसका औद्योगिक उत्पादन राखिएको छ । 

मोरङ व्यापार संघका अध्यक्ष नवीन रिजालले नेपाल, भारत, पाकिस्तान र बंगलादेश गरी चार देशका २०० भन्दा बढी स्टल राखिएको बताए । उनले भने, “व्यापार प्रवर्द्धन गर्न एक्स्पो सहयोगी हुनेछ ।”

एक्स्पोमा राष्ट्रियस्तरका कलाकारले दैनिक प्रस्तुति समेत दिने रिजालले जानकारी दिए ।