काठमाडौं । मधेस प्रदेशविरुद्ध २८ रनको जित निकाल्दै वाग्मती प्रदेशले प्रधानमन्त्री कप महिला राष्ट्रिय क्रिकेट प्रतियोगितामा सुखद सुरुआत गरेको छ ।

बिहीबार कीर्तिपुरस्थित त्रिवि क्रिकेट मैदानमा सम्पन्न खेलमा वाग्मतीले प्रस्तुत गरेको ११८ रनको लक्ष्य पछ्याउने क्रममा मधेसले निर्धारित २० ओभरमा पाँच विकेट गुमाएर ८९ रनमात्र बनाउन सक्यो । 

मधेसकी पुजा महतोले ३५ रन बनाइन् । अनुराधा चौधरीले २१ र प्रतिमा साहले १५ रन जोडिन् । यसबाहेक, अन्य ब्याटरले दोहोरो अंकमा रन जोड्न सकेनन् ।

वाग्मतीकी अस्मिना कर्माचार्यले दुई र मनिषा उपाध्यायले एक विकेट लिइन् । 

त्यसअघि टस हारेर ब्याटिङमा आएको वाग्मतीले निर्धारित २० ओभरमा चार विकेट गुमाएर ११७ रनको योगफल खडा गरेको थियो । 

वाग्मतीबाट अर्धशतक बनाउन तीन रनले चुकेकी यसोदा विष्टले ४७ रन बनाइन् । कप्तान अस्मिानले ३० र हेलिशा गुरुङले १२ रन थपे ।

मधेसकी पुजा महतोले दुई र कविता गौतमले एक विकेट लिइन् ।

आजदेखि सुरु भएको प्रतियोगितामा कुल आठ टिमको सहभागिता छ । राउन्ड रोबिन लिग पद्धतिमा सञ्चालित प्रतियोगिताको शीर्ष चार टिम प्लेअफमा प्रवेश गर्नेछन् ।