काठमाडौं । ग्लोबल आइएमई बैंक लिमिटेडका अध्यक्ष चन्द्रप्रसाद ढकालले आइतबार नेपाल राष्ट्र बैंकका गभर्नर महाप्रसाद अधिकारीसमक्ष पद तथा गोपनीयताको शपथ लिएका छन् ।

नेपाल उद्योग वाणिज्य महासंघको अध्यक्ष समेत रहेका ढकाल बैंकको हालै सम्पन्न १७औँ वार्षिक साधारणसभाबाट सञ्चालक समिति सदस्य र नवनिर्वाचित सञ्चालक समितिको पहिलो बैठकबाट अध्यक्षमा सर्वसम्मत चयन भएका हुन् ।

शपथग्रहण कार्यक्रममा अध्यक्ष ढकालले रेमिट्यान्स सेवा प्रदान गर्ने सानो कम्पनीका रूपमा स्थापित आइएमई नै आजको ग्लोबल आइएमई बैंकको अवस्थासम्म आइपुगेको स्मरण गरे । ग्लोबल आइएमई मुलुकको सबैभन्दा ठूलो र सबल एवं सक्षम बैंक बन्न सफल भएको उनले बताए । 

ग्लोबल आइएमई बैंकलाई अहिलेको अवस्थासम्म ल्याइपुर्‍याउन राष्ट्र बैंक र यसको नेतृत्वले पुर्‍याएको सहयोगको पनि उनले स्मरण गरे । उनले बैंकिङ क्षेत्रलाई थप विस्तार गर्न भविष्यमा पनि यस किसिमको सहयोग आवश्यक रहने बताए ।

ढकालले नवनिर्वाचित सञ्चालकहरूलाई आजै शपथ गराएका छन् । ग्लोबल आइएमई बैंकको १७औँ वार्षिक साधारणसभाबाट संस्थापक सेयरधनीमध्ये ढकाल, रामबहादुर भण्डारी र राधेश पन्त तथा सर्वसाधारण सेयरधनीका तर्फबाट कृष्णप्रसाद शर्मा, नारायणप्रसाद पौडेल र मदनलाल जोशी सञ्चालक समितिमा सर्वसम्मत निर्वाचित भएका थिए ।