काठमाडौं । महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले मुलुकमा भ्रष्टाचार नियन्त्रणका निम्ति महिलालाई नेतृत्वमा पुर्‍याउनुपर्ने बताएका छन् ।

महिलाले नेतृत्व लिएको स्थानीय तहमा भ्रष्टाचारमा कमी आएको उनको भनाइ छ । उनीहरूलाई मुलुकको नेतृत्वमा पुर्‍याउन सके भ्रष्टाचार नियन्त्रणको काम प्रभावकारी हुने उनको विश्वास छ ।

शनिबार काठमाडौंमा नेपाल प्रेस युनियन महिला विभागद्वारा आयोजित कार्यक्रममा मन्त्री आचार्यले महिलाले पनि आफ्नो क्षमताको विकास गर्ने कुरामा बढी ध्यान दिनुपर्ने बताए ।

“...हामी भन्छौँ– अहिले देशमा सबैभन्दा बढी भ्रष्टाचार भनेको सबैभन्दा ठूलो रोग छ । जब महिलाहरूलाई नेतृत्व दियो भने त्यहाँ भ्रष्टाचारमा अटोमेटिक कमी आउँछ । त्यो मान्यता मेरो व्यक्तिगत रूपमा पनि छ । र, मैले त्यो कुरा उठाउने पनि गरेको छु,” उनले भने, “जुनसुकै स्थानीय तहमा महिलाको नेतृत्व छ भने त्यहाँ भ्रष्टाचार कम छ । त्यसैले गर्दा महिलालाई थप अधिकार दिने कुरामा हामी गम्भीर हुनैपर्छ । र, महिला दिदीबहिनीहरूले पनि अधिकार माग्नेभन्दा पनि आफ्नो क्षमतामा अभिवृद्धि गर्दै जानुपर्छ । र, हामीले समावेशी व्यवस्था मिलाएका छौँ ।”

महिलामाथि हुने विभेदको अन्त्य मन्त्रालय एक्लैको प्रयासबाट सम्भव नहुने उनले उल्लेख गरे । घरघरमा महिलालाई हेर्ने दृष्टिकोणमा परिवर्तन भए मात्र उनीहरूमाथि हुने विभेद अन्त्य गर्न सकिने उनले बताए ।

“एउटा महिला मन्त्रालयले मात्रै गरिदिएर यो महिलामाथि हुने विभेद अन्त्य हुँदैन । जबसम्म प्रत्येक घरमा महिलाहरूलाई हेर्ने दृष्टिकोण र महिला सहभागिताका कुराका विषयमा हामी सोच्दैनौँ, तबसम्म समाज परिवर्तन हुन सक्दैन । अत्यन्तै क्षमतावान् महिलाहरू हुनुहुन्छ । र, ठाउँअनुसार उहाँहरूले अवसर पनि पाउनुभएको छ,” उनले भने, “नेपालमा पनि राष्ट्रपति महिला, प्रधानन्यायाधीश महिला, अन्य उच्च स्थानहरूमा मन्त्रालयका सचिवहरूमा पनि महिला नपुगेको अवस्था हो र ? तथापि यो कम छ ।” 

मन्त्री आचार्यले नेपालको संविधानले महिला सशक्तीकरणका निम्ति आवश्यक व्यवस्था गरेको भन्दै त्यसको प्रभावकारी कार्यान्वयनमा जोड दिनुपर्ने बताए ।