काठमाडौं । पोर्चुगलका प्रस्तावित राजदूत सनिल नेपाललाई सासंदहरूले युरोप गएका नेपाली फर्काउने योजना के छ भन्दै प्रश्न गरेका छन् । 

आजको संसदीय सुनुवाइ समितिको बैठकमा एमालेका सचेतक महेश बर्तौलाले उनलाई कूटनीति धेरै थाहै छैन भन्ने आरोप लाग्ने गरेको बताए । 

“यति धेरै गर्छु भन्नुभएको छ आधार के छ ? कूटनीति धेरै थाहा छैन भन्ने आरोप छ नि ?,” उनले सोधे । 

जनता समाजवादी पार्टी (जसपा)का सांसद प्रकाश अधिकारीले अव्यवस्थित कामदार रहेका र यो व्यवस्थित गर्ने योजना कस्ता छन् भनि प्रश्न गरे । 

राष्ट्रिय स्वतन्त्र पार्टीका सांसद डोलप्रसाद अर्यालले राजदूतमा अब्बल र बुझेको व्यक्तिलाई पठाउ भन्ने लागेन भन्दै प्रश्न गरे । “छाती ठूलो गरेर परराष्ट्र नीति बुझेको अनुभवी साथीहरू म भन्दा अब्बल र बुझेको साथी पठाउ वा उनीहरूसँग प्रतिस्पर्धा गरेर जाउँ जस्तो लागेन ?,” उनको प्रश्न छ, “किनभने यो पुरानो हैन नयाँ राजदूतावास हुनेछ । यसमा प्रस्ट पारिदिनु होला ।” 

त्यस्तै, नेपाली कांग्रेसका सांसद जीवन परियारले युरोप गएका नेपाली फर्काउने योजनाबारे जिज्ञासा राखे । “पोर्चुगलमा नेपाली अलपत्र परेको कुरा आएको छ, चुनौतीका बीच कसरी यसलाई समाधान गर्नुहुन्छ ? युरोप गएका नेपाली फर्काउने योजना केही छ ? विदेश जानुमात्र ठूलो विषय हो ?,” परियारले सोधे । 

कांग्रेसकै सांसद् रमेशजंग रायमाझीले पोर्चुगलका खेलाडी ल्याउने कुरामा मात्रै सीमित हुने आशंका व्यक्त गरे । “पोर्चुगलका खेलाडी ल्याउने कुरा कुरामा मात्र सीमित हुने हो कि ?,” रायमाझीले भने । 

कांग्रेसका प्रमुख सचेतक रमेश लेखकले पोर्चुगल श्रम गन्तव्य भएकाले चाँडोभन्दा चाँडो श्रम सम्झौता गर्न सुझाए । सरकारले पोर्चुगलमा राजदूतावास स्थापना गरी सनिल नेपाललाई राजदूत बनाउन सिफारिस गरेको छ ।