विराटनगर । सुनसरीको इटहरी उपमहानगरपालिका–४ का पुण्य पौडेल र उनकी आमा जानुकाले बुहारीको विवाह गरिदिएका छन् । बिहीबार ३४ वर्षीया सूजा पौडेलको कर्मघरबाट वैदिक परम्पराअनुसार कन्यादान गरी विवाह गरिएको हो ।

०६९ सालमा पौडेल परिवारले झापाको बैगुन्धुराबाट सूजालाई बुहारी बनाएर भित्र्याएको थियो । जानुकाले भनिन्, “मेरी कान्छी बुहारीको रूपमा भित्र्याएकी उनलाई आज छोरीको रूपमा विवाहदान गरेर बिदाइ गरेँ ।”

जानुकाका कान्छा छोरा फडिन्द्र र सूजाबीच मागीविवाह भएको थियो । फडिन्द्रको ०७१ सालमा मृत्यु भएको थियो ।

सुनसरीको डुम्राहाका रमेश रेग्मीले प्रस्ताव गरेपछि आफूहरूले राजीखुसी विवाह गराइदिएको पुण्यले बताए । “बुहारीको माइती पक्षसँग पनि यस विषयमा छलफल भयो,” उनले भने, “पारिवारिक सहमतिमै विवाह गर्ने निर्णयमा पुगेका हौँ । भनेजस्तो परिवार र उस्तै विगत भएका जोडीले राम्रो गरिखान सक्छन् भन्ने अपेक्षासहित बुहारीको विवाह गरिदिएका हौँ ।”

रेग्मीको पहिलो श्रीमतीको पनि दुई वर्षअघि मृत्यु भएको थियो । उनीतिरका एक छोरा र छोरी छन् । पौडेलकी पनि एक छोरी छिन् ।

रेग्मी सरकारी कर्मचारी हुन् । सूजा एनआईसी एसिया लघुवित्तमा कार्यरत छिन् । सूजाका बुवा कृष्ण खतिवडाले छोरी कर्मघरबाट बेहुली भई बिदा हुन पाउनु समाजका निम्ति उदाहरण भएको बताए । 

कर्मघरबाट छोरीका रूपमा बेहुली बनेर बिदाइ हुन पाउँदा गर्व लागेको सूजाले बताइन् । जीवनमा आइपरेका समस्या र त्यसको समाधानबारे धेरै सिकाइ भएको बताउँदै उनले भनिन्, “पौडेल परिवारबाट मैले छोरीकै माया पाएँ । अहिले यही घरबाट बुहारी भएर जान पाउँदा यो समाजका लागि पनि उदाहरण हो जस्तो लाग्छ ।”

अब दुवैतिरका छोराछोरीलाई साथै राखेर आफूहरूले नयाँ जीवनको सुरुआत गर्ने उनले बताइन् ।