काठमाडौं । सरकारले एनसेलको सेयर खरिदबिक्रीबारे अध्ययन भइरहेको जनाएको छ । सरकारी प्रवक्तासमेत रहेकी सञ्चार तथा सूचना तथा सूचना प्रविधि मन्त्री रेखा शर्माले मंगलबार एक विज्ञप्तिमार्फत एनसेलको सेयर खरिदबिक्रीबारे प्रचलित कानुनी प्रावधान तथा अन्तर्राष्ट्रिय विधि र प्रक्रियाको पालनामा रहेर विस्तृत अध्ययन गरिने बताएकी हुन् ।

"यस्ता क्रियाकलापबाट नेपालको दूरसञ्चार क्षेत्र र विदेशी लगानीमा पर्ने असर तथा नेपाल सरकारको राजस्व लगायतका विषयमा पर्ने प्रभावका बारेमा विस्तृत अध्ययन तथा छानबिन गर्ने छ," विज्ञप्तिमा भनिएको छ ।

सरकारले अध्ययन तथा छानबिनबाट कुनै प्रकारको अनियमितता भएको पाइए कानुनबमोजिम कडा कारबाही गर्ने चेतावनीसमेत दिएको छ ।

मन्त्री शर्माका अनुसार प्रधानमन्त्री पुष्पकमल दाहाल 'प्रचण्ड'ले सोमबार नै छानबिनका लागि निर्देशन दिइसकेका छन् ।