![बिनासर्त विपीन जोशीको रिहाइका निम्ति अन्तर्राष्ट्रिय शक्तिसँग आग्रह गर्ने निर्णय](https://12khari.top/uploads/posts/bipin-joshi1-1701335477.jpg)
काठमाडौं । प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समितिले प्यालेस्टाइनी लडाकु समूह हमासको बन्धनमा रहेका नेपाली विद्यार्थी विपीन जोशीको बिनासर्त रिहाइका निम्ति अन्तर्राष्ट्रिय समुदायसँग आग्रह गर्ने निर्णय गरेको छ । बिहीबार सिंहदरबारमा बसेको सो समितिको बैठकबाट त्यस्तो आग्रह गर्ने निर्णय गरिएको हो ।
बैठकपछि निर्णय सुनाउँदै समितिका सभापति राजकिशोर यादवले जोशीको बिनासर्त अविलम्ब रिहाइका निम्ति हमासलगायत अन्तर्राष्ट्रिय शक्तिसँग आग्रह गर्ने निर्णय गरिएको बताए ।
“नेपाली युवा जो इजरायल जानुभएको थियो, विपीन जोशी । हमासले इजरायलमा आक्रमण गर्दा विपीन जोशीलाई बन्धक बनाएको भन्ने छ, तर अहिलेसम्म जानकारी छैन । विपीन जोशीको बिनासर्त अविलम्ब रिहाइको लागि हमासलगायत अन्तर्राष्ट्रिय शक्तिहरूसँग आग्रह गरेका छौँ,” उनले भने, “नेपाल कुनै पनि पक्षधरता देश नरहेको र हामी जहिले पनि शान्तिको वकालत गर्ने भएकाले हाम्रो नागरिकलाई कुनै पनि कारणबिना यसरी बन्धक बनाइनु हुँदैन ।”
बैठकबाट समितिको ६ महिनाको भावी कार्ययोजना र कार्य प्राथमिकीकरणका निम्ति नौ सदस्यीय कार्यदल गठन गरिएको पनि उनले जानकारी दिए ।
“त्यो कार्यदल यो समितिको सभापति राजकिशोर यादवको संयोजकत्वमा नौजना समितिका सदस्यहरू छौँ । यो कार्यदलले प्राथमिकीकरण र के–के गर्ने, कुन विषयलाई कहिले राखेर कहिले टुंग्याउने भन्ने निष्कर्ष निकाल्छौँ,” उनले भने ।
कार्यदलमा संयोजक यादवसहित सदस्यमा उदयशमशेर जबरा, एकनाथ ढकाल, छिरिङ यामु लामा, देवीप्रकाश भट्टचन, डा. धवलशमशेर जबरा, प्रेम सुवाल, शिशिर खनाल र सम्झना थपलिया छन् ।