काठमाडौं । त्रिभुवन विश्वविद्यालयका उपप्राध्यापक प्रेम चलाउनेमाथि आक्रमण गर्ने ६ जना दोषी ठहर भएका छन् । बिहीबार जिल्ला अदालत काठमाडौंले उनीहरूलाई दुई वर्षको कैद सजाय र २० हजार रुपैयाँ जरिवाना सुनाएको हो ।

न्यायाधीश विनोद खतिवडाको एकल इजलासले हरि आचार्य, योगेन्द्र रावल, रूपेश साह, रविन लामा, सयुज श्रेष्ठ, निरज रानामगरलाई दोषी ठहर गरेको हो । दीपकराज ओझाले भने सफाइ पाएका छन् । दोषी ठहर भएकामध्ये आचार्य अमेरिकामा छन् ।

अदालतले फौजदारी कसुर (सजाय निर्धारण तथा कार्यान्वयन) ऐन, २०७४ बमोजिम दोषीहरूबाट पीडितका लागि २८ लाख १७ हजार रुपैयाँ क्षतिपूर्ति भराउन समेत आदेश गरेको छ ।

चलाउनेमाथि कीर्तिपुरस्थित त्रिभुवन विश्वविद्यालय परिसरमा २० असोज २०७७ मा आक्रमण भएको थियो ।

उनीहरूविरुद्ध चलाउनेले ज्यान मार्ने उद्योगको मुद्दा दायर गरेका थिए ।