काठमाडौं । नेपाल सुपर लिग (एनएसएल) को दोस्रो संस्करणको विजेताले कम्तीमा ७० लाख रुपैयाँ पुरस्कार पाउने भएको छ ।

बुधबार प्रतियोगिताको तयारीबारे जानकारी गराउन आयोजित पत्रबार सम्मेलनमा एनएसएलका निर्देशक श्रेयान्स कार्कीले विजेताले कम्तीमा ७० लाख पाउने र समर्थकको साथ रहे यो राशि एक करोडसम्म पुग्ने बताएका हुन् ।

“प्रतियोगिताको विजेतालाई कम्तीमा पनि ७० लाख रुपैयाँ पुरस्कार हुने छ । नेपाली समर्थकले साथ दिए यो एक करोड रुपैयाँसम्म पुग्ने छ,” प्रतियोगिताका निर्देशक कार्कीले भने ।

प्रतियोगिताको दोस्रो संस्करण शुक्रबारदेखि सुरु हुने भए पनि हालसम्म पुरस्कार राशि भने खुलाइएको छैन ।

मंसिर ८ गतेदेखि पुस १४ गतेसम्म काठमाडौंमा हुने प्रतियोगितामा ९ टिम सहभागी छन् ।

प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगञ्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेल्ने छन् ।