काठमाडौं । ललितपुर सिटी एफसीका मुख्य प्रशिक्षक इयान गिलाले नेपाल सुपर लिग (एनएसएल) नेपाली फुटबलका लागि अवसर भएको बताएका छन् ।

प्रतियोगिताको दुई दिनअघि बुधबार आयोजित पत्रकार सम्मेलनमा प्रशिक्षक गिलाले एनएसएल हुनु राम्रो भएको र यसले नेपाली फुटबलको स्तर बढाउन सघाउने बताए ।

“यो नेपाली फुटबलका लागि यो अवसर हो । म नेपाली टिमका खेलाडी अनन्त र अरू तीनजना खेलाडीलाई प्रशिक्षण दिन पाउँदा खुसी छु । यहाँ भएका सबै प्रशिक्षकलाई जितको दबाब छ,” उनले भने, “सबै टिमसँग प्रतियोगिता जित्न आफ्नै योजना छ । प्रतियोगिताको कुनै पनि खेल सहज हुने छैन । कुनै पनि प्रतियोगितामा सात दिन आराम हुँदा राम्रो हुन्छ । तर, यो प्रतियोगितामा दुई–तीन दिनमात्र छ । तर, एनएसएलको दोस्रो संस्करण हुँदै छ । यो हुनु नेपाली फुटबलका लागि राम्रो हो । यसले नेपाली फुटबलको स्तर बढाउन सहयोग गर्दछ ।”

यस्तै, क्लबका मार्की खेलाडी अनन्त तामाङले प्रतियोगिता प्रतिस्पर्धा बन्ने आशा व्यक्त गरे ।

“प्रतियोगिता उपाधि जित्न धेरै मेहनत गर्न पर्छ । सबै क्लबले क्वालिटी खेलाडी ल्याएका छौँ । प्रतियोगिता प्रतिस्पर्धात्मत हुने आश छ । हामी जितका लागि सतप्रतिशत दिने छौँ,” अनन्तले भने ।

मंसिर ८ गतेदेखि पुस १४ गतेसम्म काठमाडौंमा हुने प्रतियोगितामा ९ टिम सहभागी छन् । प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगञ्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेल्ने छन् ।