काठमाडौं । गुन्डानाइके समीरमान सिंह बस्न्यातमाथि कारागारभित्र निगरानी बढाइएको छ । गोली हानी निर्माण व्यवसायी महासंघका तत्कालीन अध्यक्ष शरदकुमार गौचनको हत्या अभियोगमा दोषी ठहर उनी जन्मकैदको सजाय भुक्तान गरिरहेका छन् ।

०७४ असोज २३ गते गौचनको हत्या गरिएको थियो । सोही वर्ष मंसिरमा उनी पक्राउ परेका थिए । गएको असारमा मात्र काठमाडौं जिल्ला अदालतबाट उनीसहित काले भनिने अम्बरबहादुर रानालाई जन्मकैदको फैसला सुनाइएको थियो ।

बस्न्यात गौचन हत्याका मुख्य योजनाकार हुन् । राना सुटर हुन् । जन्मकैदको फैसलापछि बस्न्यात समूहले जेलभित्रबाट अवैध धन्दा चलाउन सक्ने भन्दै कारागार प्रशासनले निगरानी बढाएको स्रोतको भनाइ ।

कारागार स्रोतले बाह्रखरीसित भन्यो, “गोलघरमै त राखेका छैनौँ, तर अरू कैदीहरूको तुलनामा हामीले उनीहरूमाथिको निगरानी बढाएका छौँ । उसको गतिविधि हेरिरहेका छौँ । उनलाई भेट्न आउनेहरू समेत निगरानीमै हुन्छन् ।”

बस्न्यातलाई भेट्न जाने मानिसको विवरण राख्नेदेखि उनले बाहिर फोन गर्दा समेत प्रशासनकै निगरानीमा मात्र गर्ने व्यवस्था मिलाइएको छ ।

समीरलाई हाल सुन्धारा कारागारको भद्र बन्दीगृहमा राखिएको छ । उनकै श्रीमती माया शेरचन समेत सुन्धारा कारागारभित्र छिन् । सोही घटनामा मतियारको अभियोगमा मायालाई अदालतले १० वर्ष कैद सजायको फैसला गरेको हो ।

गौचन हत्या अभियोगमा प्रहरीले २४ जनामाथि मुद्दा दायर गरेको थियो । तीमध्ये ६ प्रतिवादीलाई अदालतले सफाइ दिएको थियो ।

विभिन्न आपराधिक गतिविधिमा संलग्न रामेछापका सुजन पौडेल उर्फ रमेश बाहुन जेलमुक्त भएपछि समीरको गतिविधिमा समेत निगरानी बढाइएको हो ।

हाल सुन्धारा कारागारभित्र नेपाल प्रहरीको केन्द्रीय अनुसन्धान ब्युरो (सीआईबी) र उपत्यका अपराध अनुसन्धान कार्यालयको टोली समेत खटिएको छ । प्रहरीले बाहिर हुँदा समेत निगरानी बढाएपछि रमेश बाहुन नेपाल छोडेर विदेशिएका छन् । उनी दुबई पुगेका बताइएको छ ।