![इजरायलले गर्यो लेबनानको नाबातीहमा २००६ को युद्धपछि पहिलोपल्ट आक्रमण](https://12khari.top/uploads/posts/wefasdg-1700455002.jpg)
काठमाडौं । इजरायलले लेबनानको दक्षिणी सहर नाबातीहमा सन् २००६ को युद्धपछि पहिलोपटक आक्रमण गरेको छ । २००६ जुलाईको युद्धपछि पहिलोपटक इजरायली ड्रोनबाट लेबनानको दक्षिणी सहर नाबातीहमा आक्रमण गरेको लेबनानी सैन्य स्रोतले बताएको हो ।
ड्रोनबाट टुल र कफोरबीचको सडकमा रहेको स्थानीय एल्मुनियम कारखानामा दुई मिसाइल प्रहार गरिएको थियो । कारखानाका केही भाग ध्वस्त भए पनि कुनै चोटपटक र मानवीय क्षति नभएको बताइएको छ ।
नाम नखुलाउने सर्तमा स्रोतले इजरायली युद्धक विमान, हेलिकोप्टर र ड्रोनबाट दक्षिणी गाउँ ब्लिडा, ऐतारोन, ऐता अल–शाब, माजदेल जुन र नाकुरामा १० हवाई आक्रमण गरिएको र भौतिक क्षति भएको संकेत गरेका छन् ।
इजरायलमा हमासको आक्रमणको समर्थनमा हिजबुल्लाहले अक्टोबर ८ मा शेबा फार्ममा दर्जनौँ रकेट प्रहार गरेपछि लेबनान–इजरायल सीमामा ६ हप्तादेखि तनाव बढेको छ । सिन्ह्वा/न्युज एजेन्सी नेपाल