काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्माले अस्थायी आवास निर्माणमा ध्यान दिनुपर्नेलगायत ११ बुँदे सुझावसहितको पत्र प्रधानमन्त्री पुष्पकमल दाहाल ‘प्रचण्ड’लाई बुझाएका छन् ।

भूकम्प प्रभावित जाजरकोटबाट फर्किएलगतै शनिबार बालुवाटार पुगेर थापा र शर्माले चिसो बढ्दै गएको अवस्थामा त्यहाँको जनजीवन थप कष्टकर हुन सक्नेतर्फ ध्यानाकर्षण गराए । आउँदो मंसिर मसान्तभित्र अस्थायी आवास निर्माणको काम सकाउन उनीहरूले आग्रह गरे ।

अस्थायी आवास युद्धस्तरमा बनाउन सरकारले तत्काल प्रत्येक प्रभावित परिवारलाई न्यूनतम ४० हजार रुपैयाँका दरले रकम उपलब्ध गराउन उनीहरूले आग्रह गरे । सो रकम तिहारलगत्तै सम्बन्धित परिवारको हातमा पुग्ने बन्दोबस्त मिलाउन आग्रह गरिएको महामन्त्री थापाले जानकारी दिए ।

भूकम्प प्रभावित क्षेत्रमा आफ्नो रुचिको आकारमा घरभवन निर्माण गर्न चाहनेका निम्ति बैंकिङ प्रक्रियामार्फत ‘सफ्ट लोन’को सहजीकरण गर्ने निर्णय सरकारले गर्नुपर्नेमा उनीहरूले जोड दिए ।

सांसद विकास कोष कार्यक्रमका निम्ति सरकारले बजेटमा छुट्ट्याएको आठ अर्ब रुपैयाँभन्दा बढी रकम तुरुन्त परिचालन गर्न आग्रह गरिएको थापाले जानकारी दिए ।

यस्तै, शर्माले भूकम्पपछिको उद्धारमा सरकारले निकै राम्रो काम गरेको बताए । राहतको काममा भएका कमी–कमजोरीलाई सुधार गर्दै अघि बढ्नुपर्ने उनले उल्लेख गरे ।

उनले आफूहरू भूकम्प प्रभावित क्षेत्रमा पुगेर राहत र पुनःस्थापनाका कामका बारेमा जानकारी लिएको बताए ।

थापा र शर्माले भूकम्पबाट दर्जनौँ स्वास्थ्य संस्थामा क्षति पुगेको अवस्थामा बिरामीले सहज उपचार पाउने वातावरण बनाउन खोप, पोषण, प्रसूतिलगायत सेवा प्रवाहका निम्ति विशेष संयन्त्रको आवश्यकता औँल्याएका छन् ।