सिड्नी । अलराउन्डर मिचेल मार्स व्यक्तिगत कारणले स्वदेश फर्किएको क्रिकेट अस्ट्रेलियाले बिहीबार जनाएको छ । स्वदेश फर्किएसँगै उनी अनिश्चितकालका लागि एक दिवसीय विश्वकपबाट बाहिर भएका छन् ।

ग्लेन म्याक्सवेल गल्फ कार्ट (बग्गी)बाट लडेर चोटका कारण खेलबाट बाहिरिएसँगै अहमदाबादमा यसै साताको अन्त्यमा इंग्ल्यान्डसँगको भिडन्तअघि मार्सको अनुपस्थिति अस्ट्रेलियाका निम्ति अर्को झट्का हो ।

क्रिकेट अस्ट्रेलियाले मार्सका बारेमा ट्विटरमा भनेको छ, “टिममा उनको फिर्तीको समयसीमा निश्चित हुन बाँकी छ ।”

१५ सदस्यीय टिममा कसैलाई प्रतिस्थापनका निम्ति बोलाइने हो वा होइन स्पष्ट भएको छैन ।

३२ वर्षीय अस्ट्रेलियाको टी–२० का कप्तान मार्स विश्वकपमा राम्रो फर्ममा रहेका छन् । अहिलेसम्म ३७.५० को औसतमा २२५ रन बनाइसकेका छन् । पाकिस्तानविरुद्ध डेभिड वार्नरसँग २५९ रनको सुरुआती साझेदारीमा उनले १२१ रनको सानदार पारी खेलेका थिए ।

मार्स र म्याक्सवेल दुवै टिमबाट बाहिर भएपछि मार्क स्टोइनिस वा क्यामरुन ग्रिनलाई जोस बटलरको संघर्षरत इंग्ल्यान्डको सामनाका निम्ति तयार भएको देखिएको छ । इंग्ल्यान्ड अहिलेसम्म ६ मध्ये मात्र दुई खेल जितेर १० टिममा अन्तिम स्थानमा छ ।

अहिले तेस्रो स्थानमा रहेको अस्ट्रेलियाले लगातार चार खेल जितेको छ । सोमबार गल्फको एक राउन्ड खेलपछि अँध्यारोमा बग्गी पछाडिबाट खसेका म्याक्सवेल कन्कसन प्रोटोकलअन्तर्गत अनुपलब्ध छन् । किनकि, भारतमा लगातारको टुर्नामेन्टका क्रममा खेलाडीहरूले विश्राम लिएका थिए । रासस/एएफपी