काठमाडौं । संयुक्त राष्ट्रसंघका महासचिव एन्टोनियो गुटेरेसले विकासशील देशहरूले प्रत्येक वर्ष जलवायु परिवर्तनका क्षेत्रमा विकासोन्मुख देशहरूका लागि १०० अर्ब अमेरिकी डलरको प्रतिबद्धता गर्न आवश्यक रहेको बताएका छन् ।
मंगलबार संघीय संसद्को संयुक्त बैठकलाई सम्बोधन गर्दै महासचिव गुटेरेसले जलवायु परिर्तनबाट प्रभावितलाई न्याय दिन जरुरी रहेको बताएका हुन् ।
उनले जलवायु परिवर्तन गराउने तत्वको उत्सर्जनमा नेपालको न्यून भूमिका भएको तर, असर भने ठूलो सामना गरिरहेको बताए ।
जलवायु परिवतर्नको असर परिसकेको बताउँदै यसबाट प्रभावितहरूरुलाई दोब्बर सहायता प्रदान गर्नुपर्ने उनले बताए ।
जलवायु परिवतर्नका कारण भएको क्षति नेपालमा देख्न सकिने उनको भनाइ छ । उनले यसको क्षति तत्काल दिन आवश्यक रहेको बताए । अन्य दक्षिण एसियाली मुलुकहरू पनि यसको चपेटमा पर्ने उनले बताए ।
नेपालमा जलवायु परिवर्तन कारण भइरहेको समस्या अन्याय भएको उनको भनाइ छ । “जलवायु परिवतर्नका लागि नेपालले सामना गरिरहेको गम्भीर संकटलाई लिएर म चिन्तित छु,” उनले भने ।
“पग्लिदै गरेका हिमताल र यसले भविष्यमा पार्ने असर पूरै विश्वलाई देखाउन मैले एभरेस्ट बेस क्याम्पको भ्रमण गरेको हुँ,” राष्ट्रसंघका महासचिव गुटेरेसले भने ।
गुटेरेस आइतबारदेखि नेपाल भ्रमणमा रहेका छन् । भोलि बुधबार (अक्टोबर १)मा उनी नेपालबाट फर्किने कार्यतालिका रहेको छ ।
नेपाल भ्रमणका क्रममा उनले राष्ट्रपति रामचन्द्र पौडेल, प्रधानमन्त्री पुष्पकमल दाहाल 'प्रचण्ड'लगायतसँग शिष्टाचार भेटवार्ता गरेका छन् ।
