काठमाडौं । नेपालमा गतवर्ष चार महिनामा चट्याङबाट ६० जनाको मृत्यु भएको छ । 

मनसुनजन्य विपद्का घटनासहितको प्रतिवेदनअनुसार २०७९ जेठ २२ देखि असोज ३० गतेसम्म चट्याङबाट सो संख्यामा मृत्यु भएको हो ।  

सोही अवधिमा १८७ वटा चट्याङका घटनामा १५७ जना घाइते भएका  छन् । घाइतेको यो संख्या गतवर्ष भएका विपद्का घटनाबाट भएको क्षतिमध्ये सबैभन्दा धेरै भएको प्रतिवेदनमा उल्लेख छ । 

योवर्ष चट्याङका घटना अझै बढ्दो क्रममा रहेको स्वास्थ्य तथा जनसंख्या मन्त्रालयले जनाएको छ । नेपाल विपद् तथा जनस्वास्थ्य आपतकालको उच्च जोखिममा रहेको भन्दै मन्त्रालयले पूर्वतयारीका लागि सबैमा अनुरोध गरेको छ । 

चट्याङबाट हुने घाइतेका लक्षण र उपचारबारे जानकार रही उचित व्यवस्थापन गराउन सबै स्वास्थ्य संस्थालाई मन्त्रालयले आग्रह गरेको छ ।