काठमाडौं । नेपाल दूरसञ्चार कम्पनी लिमिटेड (नेपाल टेलिकम)की निमित प्रबन्ध निर्देशक संगीता पहाडी अर्यालले दूरसञ्चार सेवा शुल्क महँगो नभएको बताएकी छन् । 

सार्वजनिक लेखा समितिको बिहीबार बसेको बैठकमा टेलिकमको विषयमा जानकारी दिँदै निमित्त प्रबन्ध निर्देशक अर्यालले यस्तो बताएकी हुन् ।

उनले नेपाल टेलिकम एसियाकै दोस्रो सस्तोमा दूरसञ्चार सेवा दिने संस्था भएको दाबी गरेकी छन् । सबैभन्दा सस्तो भारतमा दूरसञ्चार सेवाको मूल्य प्रतिजीबी ०.१७ डलर छ भने नेपालमा प्रतिजीबी ०.२ डलर रहेको उनले बताइन् ।

“नेपाल टेलिकमलको दूरसञ्चार सेवा एसियाको दोस्रो सस्तोमा पर्न आउँछ । सबैभन्दा सस्तो भारतमा ०.१७ डलर प्रतिजीबी छ भने नेपालमा ०.२ डलर प्रतिजीबी पर्न आउँछ । त्यसैले नेपालको दुरसञ्चार सेवा महँगो भन्ने कुरा सान्दर्भिक होइन । विश्वमा हेर्दा नेपालमा दूरसञ्चार सेवा भारतपछिको सस्तो सेवा दिइरहेका छौँ,” समितिमा बोल्दै उनले भनिन् ।

भारतपछिको सस्तो दूरसञ्चार सेवालाई महँगो भन्ने कुरा सान्दर्भिक नभएको उनको भनाइ छ ।

२०७३ सालमा प्रतिक्षमता ३७ रुपैयाँ २५ पैसा रहेको शुल्क २०७८/०८९मा आउँदा १९ रुपैयाँ ६९ पैसामा झरेको उनले बताइन् । २०७३ सालमा प्रतिएमबी डाटा ७४ पैसाको रहेको र अहिले पाँच पैसामा झरेको उनले बताइन् ।

उनले अघि भनेकी छन्,“२०७३ सालमा प्रतिक्षमता ३७.२५ नेपाली रुपैयाँ थियो भने २०७८/०८९मा आउँदा १९.६९ पैसा छ । चार वर्षमा ३७.२५ पैसाबाट घटेर १९.६९ रुपैयाँमा झरेको छ । प्रतिएमबी डाटाको कुरा गर्दा २०७३ सालमा ७४ पैसा थियो भने अहिले प्रति एमबी डाटा पाँच पैसामा झरेको छ ।”