काठमाडौं । बझाङमा गएको मंगलबार दिउँसो ६.३ म्याग्निच्युडको भूकम्पपछि निरन्तर परकम्प मापन गरिएको छ । त्यसयता ३८० परकम्प मापन गरिएको राष्ट्रिय भूकम्प मापन तथा अनुसन्धान केन्द्रले जनाएको छ ।

शनिबार अपराह्न ४ बजेर १७ मिनेटसम्म सो संख्यामा परकम्प मापन गरिएको केन्द्रको सुर्खेतस्थित कार्यालयले जानकारी गराएको छ । कार्यालयका अनुसार १.५ म्याग्निच्युडदेखिका परकम्प मापन हुन्छ ।

“१.५ म्याग्निच्युडदेखिका परकम्प मापन हुन्छ । मानिसले महसुस नगर्ने परकम्प पनि मापन गरिन्छ,” कार्यालय स्रोतले बाह्रखरीसित भन्यो ।

बझाङमा उक्त भूकम्पपछि यो अवधिमा ४ म्याग्निच्युडदेखि माथिका १३ परकम्प मापन गरिएको केन्द्रले जनाएको छ ।

तीमध्ये ५ म्याग्निच्युडदेखि माथिका चार परकम्प थिए । बझाङमा यो अवधिमा मापन गरिएका मध्ये शनिबार मध्याह्न पौने १२ बजेको ५.३ म्याग्निच्युडको परकम्प सबैभन्दा ठूलो थियो ।

• अध्ययनले भन्छ– लगातारका धक्काले ठूला भूकम्पको जोखिम कम गर्दैन 

गएको मंगलबार दिउँसो ३ बजेर ६ मिनेटमा बझाङ सदरमुकाम चैनपुर आसपास केन्द्रविन्दु भएर ६.३ म्याग्निच्युडको भूकम्प गएको थियो । सोही दिन दिउँसो २ बजेर ४० मिनेटमा बझाङकै तालकोट आसपास केन्द्रविन्दु भएर ५.३ म्याग्च्यिुडको भूकम्प गएको केन्द्रले जनाएको छ ।

उक्त भूकम्पपछि गएको पहिरोमा परी एक महिलाको मृत्यु भएको छ । बझाङसहित सदूरपश्चिम प्रदेशका विभिन्न जिल्लामा भौतिक संरचनामा क्षति पुगेको छ । मानिस घाइते समेत भएका छन् ।