काठमाडौं । नेपाल टेलिकमले नेपालको उत्तर पश्चिमी नाका दार्चुलाको टिंकरमा मोबाइल सेवा पुगेको जनाएको छ ।
मंगलबार असोज १६ गतेदेखि टिंकर क्षेत्रमा मोबाइल सेवा सञ्चालनमा आएको र त्यहाँका जनताले फोनमार्फत कुराकानी गर्नसक्ने टेलिकमले बताएको हो ।
चीनको सिमानासँग जोडिएको दार्चुलाको व्यास गाउँपालिका–१ मा अवस्थित उत्तर पश्चिमी नाका टिंकरमा नेपाल टेलिकमले भीस्याट प्रविधिमार्फत टूजी प्रविधिको सेवा सञ्चालनमा ल्याएको हो ।
कम्पनीले यसका लागि आवश्यक सामग्री कैलालीको अत्तरिया र दार्चुलाको छाङरुबाट टिंकर पुर्याएको थियो ।
यो क्षेत्रमा यसअघि भीस्याट प्रविधिका दुई लाइन टेलिफोन सञ्चालनमा रहेको टेलिकमले बताएको छ ।
"अब भने टिंकर क्षेत्रमा रहेका करिब ५०० सेवाग्राहीले आफ्नै मोबाइलबाट कुराकानी गर्न सक्नेछन्," कम्पनीले एक विज्ञप्ति जारी गर्दै भनेको छ ।
यो बाहेक सो क्षेत्रमा अवस्थित सशस्त्र प्रहरी बल र इलाका प्रहरी कार्यालयमा कार्यरत प्रहरी तथा सो क्षेत्रमा आउने पर्यटकहररू समेत यसबाट लाभान्वित हुने नेपाल टेलिकमले जनाएको छ ।
करिब तीन हजार ७०० मिटरको उचाईमा अवस्थित टिंकर भारतसहितको त्रिदेशीय सिमाना जोडिएको स्थान छाङरुबाट करिब १२ किलोमिटर र सदरमुकाम खलंगाबाट करिब ८० किलोमिटर दूरीमा अवस्थित छ । त्यहाँबाट करिब आठ किलोमिटर हिँडेपछि चीनको सिमानास्थित १ नम्बर पिलर पुग्न सकिन्छ ।
