काठमाडौं । शिक्षा, विज्ञान तथा प्रविधिमन्त्री अशोककुमार राईले शिक्षकलाई राजनीतिबाट टाढा राख्ने विषय विधेयकमा समावेश गरिएको बताएका छन् । आइतबार प्रतिनिधिसभामा विद्यालय शिक्षा विधेयक, २०८० पेस गर्दै उनले शिक्षकलाई राजनीतिबाट टाढा राख्ने प्रयास गरिएको बताएका हुन् ।

मान्छेको व्यक्तिगत आस्था आफ्नो ठाउँमा भए पनि त्यसले पठनपाठनलाई प्रभावित पार्न नहुनेमा सरकार सचेत रहेको उनले उल्लेख गरे । उनले ट्रेड युनियन अधिकारअन्तर्गत आफ्नो पेसागत हकहितका निम्ति संगठित हुन पाउने शिक्षक महासंघको व्यवस्था विधेयकमा गरिएको बताए ।

अहिलेको समसामयिक परिवर्तनलाई समेत आत्मसात् गर्ने गरी पाठ्यपुस्तक तयार गर्नुपर्नेतर्फ ध्यान दिइएको उनको भनाइ छ ।