काठमाडौं । आइतबारको प्रतिनिधिसभा बैठकमा विद्यालय शिक्षा विधेयक, २०८० प्रस्तुत भएको छ । शिक्षा, विज्ञान तथा प्रविधिमन्त्री अशोक कुमार राईले विधेयक सदनमा प्रस्तुत गरेका हुन् ।

यसअघि, सांसद प्रेम सुवालले विधेयकलाई प्रस्तुत गर्न अनुमति माग्ने प्रस्तावमाथि विरोधको सूचना दर्ता गराएका थिए ।

सांसद सुवालले शिक्षा उत्पादन श्रमसँग जोड्ने शिक्षा नआएको, शिक्षकलाई तालिमको कुरा नआएको साथै शिक्षण पेशालाई आकर्षक बनाउने गरी विधेयक नआएको विरोधको सूचना जानकारी गराउँदै उल्लेख गरे ।

उनले गुणस्तरीय शिक्षा कायम गर्न राष्ट्रिय स्तरमा कक्षा १० मा परीक्षा लिइनुपर्नेमात्र नभई शिक्षकले देश र जनताको हितमा राजनीति गर्न पाउनुपर्ने गरी विधेयक आउनुपर्ने उल्लेख गरे ।

उक्त विरोध प्रस्तावमा शिक्षामन्त्री अशोक राईले ०७५ सालमा मस्यौदा बनेर पनि विधेयक कानुन बन्न नसकेको भन्दै असन्तुष्टि र अनुचित विषयमा संशोधन गरेर परिमार्जनसहित कानुन बनाउने अधिकार सांसदहरुमा निहित रहेको बताए ।

सुवालको विरोध प्रस्ताव बहुमतले अस्वीकार गरेपछि विधेयक सदनमा पेस भएको छ । विधेयक पेस भएसँगै आइतबारको प्रतिनिधिसभा बैठक असोज १६ गते मंगलबार दिउँसो १ बजे बस्ने गरी स्थगिन भएको छ ।