काठमाडौं । बक्सिङमा आशा गरिएका दुई खेलाडी सुस्मा तामाङ र भुपेन्द्र थापाको जारी १९औँ एसियाडमा चुनौती समाप्त भएको छ ।

हाङझाओको जिम्नाजियम बुधबार पुरुष ६३.५ केजीमुनि भुपेन्द्र चाइनिज ताइपेइका लाई चुन इनसँग र सुस्मा महिला ५० केजीमुनि कजाखस्तानकी किजाइबे नाजिमसँग पराजित भएका हुन् । 

भुपेन्द्र १३औँ दक्षिण एसियाली खेलकुद (साग)मा स्वर्ण विजेता हुन् भने सुस्मा नेपालको बक्सिङ इतिहासमा ऐतिहासिक सफलताको कीर्तिमान छ । सुस्माले गत वर्ष थाइल्याण्डमा यू–२२ एएसबीसी बक्सिङ च्याम्पियनसिपमा रजत पदक जितेका थिइन् । यसै एसियाली खेलकुदका लागि नेपालको बक्सिङले विदेश प्रशिक्षकका साथै अन्तर्राष्ट्रिय प्रशिक्षणको अवसर पनि पाएको थियो ।

त्यसकारण पनि बक्सिङबाट पदकको आशा गरिएको थियो । अनुभवी बक्सर भुपेन्द्र र पछिल्लो वर्ष मात्र ऐतिहासिक पदक ल्याएकी सुस्माबाट सुखद प्रदर्शन हुने आशा रहेपनि उनीहरूले पहिलो खेल नै जित्न सकेनन् । 

सुस्मा अन्तिम १६ मा कजाखस्तानकी नाजिमसँग ५–० ले सहजै पराजित भइन् । भुपेन्द्रले भने एक जजको नतिजा बराबरीमा पारे पनि ४–० को नतिजा सुम्पिन बाध्य भए । लामो समय विशेष प्रशिक्षण गरेको बक्सिङमा नेपालका १३ खेलाडीको चुनौती तय थियो र अब तीन खेलाडीले खेल्न बाँकी छ ।