काठमाडौं । १९औँ एसियाली खेलकुदअन्तर्गत बक्सिङमा नेपाली मुक्केबाज संगीता सुनार र दीपक श्रेष्ठले पराजय भोगेका छन् ।

संगीता भियतनामकी खेलाडी लिन्हसँग अंकको आधारमा पराजित भएकी हुन् । आइतबार दिउँसो हाङजाओ जिम्नेजियममा भएको महिला ६० केजी तौल समूहअन्तर्गत राउन्ड अफ ३२ को भिडन्तमा सुनारलाई भियतनामकी हा थि लिन्हले ५–० अंक ले पराजित गरेकी हुन् ।

त्यस्तै, पुरुषको ८० केजी तौल समूहमा पनि नेपालका दीपक श्रेष्ठ उज्वेकिस्तानका टुराबेक खबिबुल्लएइभसँग ५–० अंकमै पराजित भए । राउन्ड अफ ३२ को भिडन्तमा दीपकलाई टुराबेकले युनानिमोस डिसिजनको आधारमा पराजित गरे ।

महिला ५४ केजीमा नेपालकी मिनु गुरुङको पनि चुनौती समाप्त भएको छ । १३औं दक्षिण एसियाली खेलकुदकी स्वर्णधारी मिनु जापानकी किनोसिता रिंकासँग ५–० ले पराजित भइन् । व्यक्तिगत स्पर्धामा नेपालबाट सबैभन्दा बढी खेलाडी सहभागी खेल बक्सिङ हो । पुरुष सात र महिला ६ गरी १३ खेलाडी सहभागी छन् ।

सुटिङ

सुटिङको महिला १० मिटर एयर राइफलको ६४० पूर्णाङ्कमा नेपालका शिल्शा भण्डारीले ६१६.९ तथा सुस्मिता नेपालले ६०७.९ अंकको प्रदर्शन गरे । सुटिङमा नेपालबाट दुई महिला खेलाडी मात्र सहभागी छन् ।

रग्बी : नेपालको चुनौती समाप्त

रग्बी सेभेन्समा नेपालको चुनौती आइतबार समाप्त भएको छ । समूह ‘डी’मा नेपालसहित यूएई, चीन र अफगानिस्तान रहेका थिए । नेपालले समूह चरणको तीनै खेल आइतबारै खेलेको थियो । तीनै खेलमा नेपाल पराजित भयो ।

यूएईले नेपाललाई ५५–७ ले पराजित गर्‍यो । नेपालका लागि विक्रम पुरीले एक कन्भर्सनबाट दुई तथा पुजन फेवालीले एक ट्राइबाट पाँच स्कोर गरे । त्यस्तै, आयोजक चीनले नेपाललाई ६५–० तथा अफ्गानिस्तानले नेपाललाई ४१–० ले हरायो । नेपालबाट पुरुष रग्बी टोली मात्र सहभागी छ ।

उसु : विजयी सातौँ स्थानमा

हाङझाउ एसियाडको उसुमा १३औँ सागका स्वर्ण विजेता विजय सिन्जाली थाउलोको छाङछ्वानमा समग्रमा सातौँ स्थानमा रहे । विजयले ९.७०३ अंक ल्याउँदै १४ खेलाडी सहभागी उक्त स्पर्धामा सातौँ भए ।

यस विधामा स्वर्ण जितेका चीनका सुन पेयुनले ९.८४० अंक ल्याए । रजत विजेता इन्डोनसियाका मार्भेलो जाभियरले ९.७८६ अंक र काँस्य विजेता मकाउका ची कुवानले ९.७६० ल्याए । सबिता राईले ८.७९६ अंक ल्याउँदा उनी १४औँ स्थानमा खुम्चिइन् ।

उसुको सान्सौं (फाइट) मा एलिना चौधरी र रोहित चुनारो पराजित भए । महिला ५२ केजी तौल समूहको क्वार्टरफाइनलमा एलिना इरानकी मानसोर्‍यान इलाहेसँग पराजित भइन् । रोहित पनि पुरुष ५६ केजी तौल समूहको क्वार्टरफाइनलमा किर्गीस्तानका एमानबेकोभसँग अभाजबेकसँग २–० ले पराजित भए ।

सान्सौंकै पुरुष ६० केजीमा नेपालका पदम राई लाओसका साइबोन्फेङसँग २–० तथा ६० केजीमा नेपालका मंगलप्रसाद थारु किर्गिस्तानका ओमुरजाकोभ अस्काटसँग क्वाटरफाइनलमा पराजित भएपछि कम्तीमा काँस्य पदक निश्चित गर्नबाट चुके ।