काठमाडौं । रौतहटमा हत्याको आरोपमा एकजना पक्राउ परेका छन् । कटहरिया नगरपालिका–५ का २५ वर्षीय बद्री साहलाई पक्राउ गरिएको प्रहरीले जनाएको छ ।

स्थानीय ३२ वर्षीय सुनील यादवको हत्या गरेको आरोपमा शुक्रबार राति प्रहरीले उनलाई नियन्त्रणमा लिएको हो । प्रहरीका अनुसार सोही ठाउँका ५० वर्षीय रामबाबु साहलाई सुनीलको छोराले जिस्काएको, धुलो माटो छर्किएको विषयमा विवाद भएको थियो ।

त्यसक्रममा रामबाबुका छोरा बद्रीले धारिलो हतियार प्रहार गर्दा सुनील गम्भीर घाइते भएका थिए । कटहरियास्थित प्राथमिक स्वास्थ्य केन्द्रमा उपचारका क्रममा उनको मृत्यु भएको थियो ।

उक्त झैझगडामा संलग्न रामबाबुसहित अरू चारजनालाई पनि नियन्त्रणमा लिइएको प्रहरीले जानकारी गराएको छ । घटनाबारे प्रहरीले थप अनुसन्धान गरिरहेको छ ।