काठमाडौं । प्रधानमन्त्री पुष्पकमल दाहाल 'प्रचण्ड'ले नेपाल नागरिक उड्डयन प्राधिकरण (क्यान)को नयाँ भवनको उद्घाटन गरेका छन् । शुक्रबार प्रधानमन्त्रीले एक समारोहकाबीच सिनामंगलमा बनेको क्यानको नयाँ भवन उद्घाटन गरेका हुन् ।

प्राधिकरणले सिनामंगलमा रहेको करिब ३० रोपनी जग्गामध्ये चार रोपनी २ आना जग्गामा १८ हजार ७२१ वर्ग मिटर बिल्टअप एरिया भएको तीनतले बेसमेन्टसहित १२ तले भवन निर्माण गरेको छ ।

प्राधिकरणले आफ्नै स्रोतमा भवन निर्माण गरेको हो । भवन निर्माण गर्दा मूल्य अभिवृद्धि करबाहेक एक अर्ब ८० खर्च भएको प्राधिकरणले जनाएको छ ।

भवनमा कर्मचारी तथा सेवाग्राहीहरूलाई सहजरूपमा सेवा प्रवाह गर्ने तथा सेवा लिने अन्तर्राष्ट्रियस्तरको वातावरण उपलब्ध गराइएको प्राधिकरणका सहप्रवक्ता ज्ञानेन्द्र भुलले जानकारी दिए ।

प्राधिकरण अन्तर्राष्ट्रिय प्रकृतिको संस्था भएकाले स्वदेशी तथा विदेशी सेवाग्राही, अन्य देशका नियामक तथा हवाई सेवा प्रदाएक संघ संस्थाहरूलाई दिनुपर्ने सेवालाई समेत मध्यनजर गरेर बनाइएको भवनले सकारात्मक प्रभाव पार्ने अपेक्षा गरिएको छ । 

भवनको दुईवटा बेसमेन्टमा ६५ वटा कार, १२० वटा मोटरसाइकल तथा २५ वटा साइकल पार्किङ क्षमता छ ।