काठमाडौं । एसिया कप–२०२३ को सुपर फोरमा श्रीलंकाविरुद्ध पाकिस्तानले पहिले ब्याटिङ गर्ने भएको छ । 

वर्षाका कारण निर्धारित समयभन्दा दुई घण्टा ढिलो सुरु हुन लागेको खेलको टस जितेपछि पाकिस्तानका कप्तान बाबर आजमले ब्याटिङको निर्णय गर्दै श्रीलंकालाई फिल्डिङको निम्तो दिए । वर्षाका कारण ढिलो गरी सुरु भएको खेलको निर्धारित ओभर ४५ ओभरमा घटाइएको छ ।

प्रतियोगिताको फाइनलमा प्रवेशका लागि पाकिस्तानालाई आज जित्नैपर्ने दबाब छ । यसअघि पहिलो खेलमा बंगलादेशलाई सात विकेटले हराएको पाकिस्तानले भारतसँग भने २२८ रनको हार बेहोरेको थियो ।

यता, श्रीलंका भने खेल रद्द भए पनि नेट रनरेटका आधारमा प्रतियोगिताको फाइनल पुग्ने छ । सुपर फोरको पहिलो खेलमा बंगलादेशलाई २१ रनले हराएको श्रीलंका दोस्रो खेलमा भारतसँग ४१ रनले पराजित भएको थियो ।

प्रतियोगितामा भारतले भने फाइनलमा स्थान बनाइसकेको छ ।