काठमाडौं । संविधानसभा अध्यक्ष, नेकपा (एमाले)का उपाध्यक्ष एवं सांसद सुवास नेम्वाङको मुटुमा यसअघि कुनै समस्या नदेखिएको बताइएको छ । उनले लामो समयदेखि मधुमेह र उच्च रक्तचापको औषधि सेवन गर्दै आएका थिए । हृदयाघातअघि नेम्वाङको मुटुमा भने कुनै समस्या नरहेको उनका निजी चिकित्सक डा. पुष्प रिजालले बताए ।

डा. रिजालले विगत पाँच वर्षदेखि नेम्वाङको नियमित स्वास्थ्य परीक्षण गर्दै आएका थिए । “मैले हेर्नुभन्दा पहिलेदेखि नै उहाँ सुगर र प्रेसरको औषधि खानुहुन्थ्यो । कहिलेकाहीँ मुटुको चाल तलमाथि हुन्थ्यो, तर अरू जटिल समस्या उहाँलाई कहिल्यै देखिएको थिएन,” डा. रिजालले बाह्रखरीसित भने ।

सोमबार के भएको थियो ?
संसद् सचिवालयमा कार्यरत प्रदीप घिमिरेले सभामुखसहित सांसदको स्वास्थ्य परीक्षण गर्दै आएका छन् । सोमबार बेलुका करिब ५ बजे नेम्वाङको नियमित स्वास्थ्य परीक्षणका लागि घिमिरे उनकै निवास बालुवाटार पुगेका थिए ।

परीक्षणका क्रममा उनको ज्वरो १०० डिग्री फरेनहाइड, प्रेसर १३०/८० र अक्सिजनको लेभल ९५ देखिएको थियो । स्वास्थ्य अवस्था सामान्य देखिएपछि घिमिरे नेम्वाङनिवासबाट फर्किए । यसबारे डा. रिजाललई पनि खबर गरिएको थियो ।

“मैले साँझ ६ बजे उहाँ (नेम्वाङ)लाई फोन गरेर सोधेको थिएँ– कस्तो छ बुबा हजुरलाई, म आउनुपर्छ कि ? उहाँले ‘सबै इन्डिकेटर नर्मल छ, म ठिक छु, तिमी आउनु पर्दैन’ भन्नुभयो,” डा. रिजालले भने ।

उनका अनुसार नेम्वाङ खानपानमा विशेष ध्यान दिने गर्थे । साधारण खाना मात्र खान्थे । नेम्वाङले घरबाहिर नखाने र मादकपदार्थ सेवन नगर्ने गरेको डा. रिजालले बताए ।

नेम्वाङ मंगलबार बिहान करिब १ः३० बजेतिर घरमै बाथरुममा अचेत अवस्थामा भेटिएका थिए । उनलाई बिहान १ः५० बजे महाराजगन्जस्थित त्रिवि शिक्षण अस्पतालमा पुर्‍याइएको थियो ।

“अस्पताल ल्याउँदा उहाँको ‘साइन्स अफ लाइफ’ केही थिएन । हामीले सबै इन्डिकेटरबाट पुष्टि गर्न खोज्यौँ, अस्पताल ल्याइपुर्‍याउनुअघि नै बितिसक्नुभएको रहेछ,” शिक्षण अस्पतालमा नेम्वाङलाई हेरेका मुटुरोग विशेषज्ञ डा. रमेशकुमार महर्जनले भने ।

हृदयाघातअघि नेम्वाङमा मुटुको समस्या पुष्टि हुने कुनै ‘हिस्ट्री’ नदेखिएको पनि डा. महर्जनले बताए ।