विराटनगर । कोसी प्रदेश सभामा नेपाली कांगे्रेसका सांसद खगेनसिंह हाङगाम प्रहरीविरुद्ध दिएको अभिव्यक्तिका कारण विवादमा तानिएका छन् । 

हाङगाम ताप्लेजुङ प्रदेश निर्वाचन क्षेत्र नम्बर २ बाट निर्वाचित सांसद हुन् ।  सांसद हाङगामले केही दिनअघि जिल्ला प्रहरी कार्यालयका डीएसपी राजन लिम्बू र उनको परिवारका सदस्यलाई लक्ष्य गरी ज्यान मार्ने धम्की दिएको भिडियो यतिबेला समाजिक सञ्जालमा भाइरल बनेको छ । 

डीएसपी र उनका परिवारलाई लक्षित गरी ‘ज्यान मार्ने धम्की दिँदै गरेको’ भिडियोमा देख्न सकिन्छ ।  भदौ २१ मा ताप्लेजुङ सदरमुकाम फुङलिङमा लाखे मेलाको अन्तिम दिन थियो ।  त्यहाँ सादा पोशाकमा प्रहरी खटिएका थिए । प्रहरीले स्थानीयलाई जिस्क्याएको सांसद हाङगाम र उनी पक्षधर युवाको आरोप छ । 

त्यसलगत्तै प्रहरीले सांसदको घर रातभर घेराउ गरेर धम्की र मानसिक तनाव दिएको हाङगामको दाबी छ ।  “प्रहरीले बखेडा झिकेको हो त्यही भएर मैले पनि जवाफ दिएको हुँ,” हाङगामले भने, “मेलाको रिस साँध्न प्रहरीले एकसय जनाभन्दा धेरै स्थानीयलाई निर्मम ढंगले कुटपिट गरेको छ ।”

एकजना प्रहरी जवानले युवतीलाई दुर्व्यवहार गरेको घटना देखेपछि काठमाडौंबाट पाहुनाको रुपमा ताप्लेजुङ आएका व्यक्तिले ‘यो गलत भयो’ भन्दा निर्मम कुटपिट गरेको हाङगामले दाबी गरेका छन् । “कुटपिट भएको घटनाबारे आफूलाई फोन आएपछि त्यहाँ गएको र त्यस क्रममा प्रहरीसँग उपस्थित युवाबीच ठेलमठेल चलेको हो,” उनले भने,“म घर फर्किएपछि प्रहरी आएर फेरि मेरो घरमा ढुंगा र बोतल हान्ने काम गरियो ।” 

प्रहरीले भने ताप्लेजुङमा सुरक्षा व्यवस्था बिग्रन नदिन प्रहरीले आफ्नो कर्तव्य पालना गरेको जनाएको छ ।  त्यही क्रममा सांसद हाङगाम र उनी समर्थक युवाले सुरक्षा व्यवस्था खलल गर्न खोजेको बताइएको छ । ताप्लेजुङमा प्रदेश सांसद र प्रहरीबीचको विवाद समाधान गर्न प्रहरी उपरीक्षक ऋषिराम कँडेलको नेतृत्वमा छानबिन समिति गठन भएको छ ।