मकवानपुर । वाग्मती प्रदेश सरकारका सामाजिक विकासमन्त्री कुमारी मोक्तानले चालु आर्थिक वर्षमा करिब चार हजार युवालाई रोजगारीका लागि कार्यक्रम गर्ने तयारी गरिएको बताएकी छन् ।

मन्त्रालयले युवालाई स्वदेशमै रोजगारी सिर्जना गर्नका लागि १५ करोड रुपैयाँ बजेट छुट्ट्याएर चालु आवमा काम गर्न लागिएको मन्त्री मोक्तानले जानकारी दिइन् ।

प्रदेशका युवालाई पहिले आम्दानी हुने खालको सीप सिकाउने, त्यही सीप सिकेको काम गर्नका लागि बीउ पुँजी पनि दिएर रोजगारी सिर्जना गर्न लागिएको उनको भनाइ छ ।

प्रदेशअन्तर्गतका १३ वटै जिल्लाका युवालाई कार्यक्रममा समेट्न लागिएको उनले उल्लेख गरिन् । यस कार्यक्रमको कार्यविधि बनाउन लागिएको मन्त्री मोक्तानले बताइन् । कार्यविधि निर्माणपछि मन्त्रालयअन्तर्गतका कार्यालय, सीटीईभीटीलगायत संस्थामार्फत कार्यान्वयन गरिने उनले जानकारी दिइन् ।

गत आर्थिक वर्षमा कार्यक्रमका लागि प्रदेश सरकारले बजेट छुट्ट्याए पनि काम हुन सकेन । पहिले श्रम, रोजगार तथा यातायात मन्त्रालयमा बजेट राखिएको थियो । पछि सामाजिक विकास मन्त्रालयमा पठाइएको बजेट समय अभावका कारण काम गर्न सकिएको थिएन । रासस