काठमाडौं । फ्रान्ससँग २–० ले पराजित भएपछि आयरल्यान्डको युरो–२०२४ मा छनोट हुने सम्भावना अझ कमजोर बनेको छ ।

घरेलु मैदान पार्क डे प्रिन्समा रियाल मड्रिडका मिडफिल्डर चुवामेनीले १९औँ मिनेटमा उत्कृष्ट गोल गर्दै फ्रान्सलाई अग्रतामा राखेका थिए । दोस्रो हाफको सुरुआतमै बेन्चबाट आएका मार्कुस थुरमले गोल गरेपछि फ्रान्सले तीन अंक निश्चित गरेको हो ।

युरो–२०२४ क्वालिफायरमा पाँच खेलमा शतप्रतिशत जित निकालेको फ्रान्स १५ अंकसहित समूह ‘बी’को शीर्ष स्थानमा छ । चार खेलबाट तीन अंक जोडेको आयरल्यान्ड तालिकाको चौथो स्थानमा छ ।

क्वालिफायरमा शुक्रबार नै भएका अन्य खेलहरूमा समूह ‘ई’मा पोल्यान्डले फारोइ आइसल्यान्ड्सविरुद्ध २–० को जित निकाल्यो । समूह ‘बी’कै अर्को खेलमा नेदरल्यान्ड्सले ग्रीसमाथि ३–० को सहज जित हासिल गर्‍यो । समूह ‘एच’को डेनमार्कले सान मारिनाविरुद्ध ४–० र स्लोभानियाले नर्दन आयरल्यान्डविरुद्ध ४–२ को जित हासिल गरे ।