काठमाडौं । चलचित्र विकास बोर्डले नेपाली कथानक चलचित्र ‘एक भगवत् गीता’लाई सेन्सरका लागि सिफारिस दिन अस्वीकार गरेपछि निर्माण पक्षले असन्तुष्टि जनाएको छ । आज पत्रकार सम्मेलन गरेर निर्माण पक्षले सेन्सरका लागि सिफारिस नगरे आफूहरू नेपालबाटै पलायन हुन तयार रहेको बताएको हो । 

चलचित्रका निर्माता सुनील कुमार थापाले बोर्ड नै नेपाली चलचित्रको पक्षमा नरहेको गुनासो गरे । "विकास बोर्डले सेन्सरका लागि सिफारिस नगर्ने हो भने पनि ठिक छ । मैले चलचित्र क्षेत्रमा काम गरेको २७ वर्ष भयो । हामी नेपाली सिनेमा क्षेत्रबाटै बिदा भएर अमेरिका बस्न तयार छौँ । यही क्षेत्रमा केही गरौँ भनेर हामीले काम गरिरहेको हो । विकास बोर्ड चलचित्रकर्मीको पक्षमा उभिनुपर्छ," थापाले भने ।

केही धार्मिक संस्थाहरूले ‘एक भगवत् गीता’को नाममा प्रश्न उठाउँदै आएका छन् । हिन्दु जागरण नेपाल, शिव सेना नेपाल, विश्व हिन्दु युवा संघ अन्तर्राष्ट्रिय समितिले नाम र यसभित्र रहेका विषयमा आपत्ति जनाउँदै बोर्डमा निवेदन दिएका थिए । उनीहरूले चलचित्रको नाम परिवर्तन गर्न माग गरेका छन् ।

तर, निर्माण पक्षले नाम फेर्न नमिल्ने बताएको छ । "नाम हटाउने हो भने केही पनि रहँदैन । नाम हटाउँन सकिँदैन," थापाले भने ।

उता बोर्डले भने अन्तिम निर्णय भइनसकेको बताएको छ । चलचित्र विकास बोर्डका सदस्यसमेत रहेका प्रवक्ता केएल पीडितले भोलि बोर्डको बैठक बसेर आवश्यक निर्णय लिने जानकारी दिए ।

"हामीले सिफारिस नदिएको होइन । भोलि बोर्डको बैठक बसेर के गर्ने भनेर निर्णय गर्छौं । अहिलेलाई रोकेको मात्र हो । सिफारिस नै नगर्ने भनेर निर्णय भइसकेको छैन । हामी चलचित्रकर्मीकै पक्षमा छौँ," उनले भने ।