काठमाडौं । परराष्ट्रमन्त्री एनपी साउदले प्रधानमन्त्री पुष्पकमल दाहाल प्रचण्डको चीन भ्रमणको तयारी भइरहेको बताएका छन् । बिहीबार प्रतिनिधिसभाको अन्तर्राष्ट्रिय सम्बन्ध र पर्यटन समितिको बैठकमा उनले भ्रमणमा डेलिभरी योग्य परियोजना प्रस्ताव गर्ने तयारी रहेको सुनाए ।

“डेलिभरी योग्य परियोजना प्रस्ताव गर्ने विचार गरेका छौँ । चीनले नेपाललाई सहयोग अनुदान गर्दै आएको छ । कतिपय रकम विनियोजन गर्न सकेका थिएनौँ । विनियोजनका लागि अर्थ मन्त्रालयसँग गम्भीर गृहकार्य गरिरहेको छौँ,” उनले भने ।

उनले भ्रमणका क्रममा कोभिडका कारण बन्द भएको नाका खोल्ने विषयमा एजेन्डा रहने गरी छलफलको भइरहेको जानकारी दिए ।

मन्त्री साउदले चीन सरकारले नक्सा जारी गरेपछि नेपालको संसद्ले सन २०२० ले पारित गरेको नक्साको सम्मान गनुपर्ने बताए । उनले सीमा वार्ताबाट समस्या समाधान गरिने बताए ।

“छिमेकी देशसँग सुमधुर सम्बन्ध रहँदै आएको छ,” उनले भने, “भारतसँग पनि मित्रवत लिन्छौँ । अन्तर्राट्रिय समुदायसँग मिलेर काम गर्न चाहन्छौँ ।”