काठमाडौं । नेकपा (एमाले)का अध्यक्ष केपी शर्मा ओलीले पार्टीको लुम्बिनी प्रदेश नेतृत्वको समस्या समाधान गर्न केन्द्रीय सचिवालयका नेताहरूलाई निर्देशन दिएका छन् ।

शनिबार बुटवलमा प्रदेश अधिवेशन उद्घाटन गर्दै उनले उपाध्यक्ष विष्णु पौडेल र शंकर पोखरेलका नाममा अनावश्यक अभ्यास नगर्न पनि चेतावनी दिए ।

“दुवैजना (विष्णु र शंकर)को भनाइ सुनेँ, उहाँहरू सुदृढ एकता चाहिन्छ, एकताबद्ध भएर अघि जानुपर्छ, त्यसको कुनै विकल्प छैन भनिरहनुभएको छ भने उहाँहरूको नाममा अनावश्यक अभ्यास नगरौँ,” ओलीले भने ।

उनले फलानो नेताको आशीर्वाद भन्ने कुरा गर्न नहुनेमा जोड दिए । नेतृत्वका लागि आफ्नो इच्छा भए नाम बताउन आग्रह पनि गरे ।

एमालेका १९ सचिवालय सदस्यमध्ये लुम्बिनीमा उपाध्यक्षहरू युवराज ज्ञवाली र विष्णु पौडेल, महासचिव शंकर पोखरेल, उपमहासचिव प्रदीप ज्ञवाली, सचिवहरू गोकर्ण विष्ट र छविलाल विश्वकर्मा छन् ।

नेताहरूको लाइन भएको प्रदेशमा चित्त बुझ्ने गरी आजै समाधान निकाल्न उनले निर्देशन दिए ।

“यत्रो विधि नेताहरूको लाइन यहीँ, नेताहरूले मिलाउनु पर्दैन ? महासचिव जानुभएको (चीन) छ, युवराजजी आउन पाउनु भएन,” ओलीले भने, “अरू नेताहरू भरे बेलुका बस्नूस्, सबै साथीहरूलाई चित्त बुझ्ने समाधान निकाल्नूस्, भोलि बिहान मै घोषणा गर्दिउँला, केही छैन । तर, समाधान निकाल्नूस् ।”

उनले सचिव र लुम्बिनी इन्चार्ज पद्मा अर्याललाई पनि मिलाउन भने । लुम्बिनीबाट नमुनाको काम हुनुपर्ने उनको भनाइ छ ।

एमाले लुम्बिनीको नेतृत्वका लागि पौडेलनिकट राधकृष्ण कँडेल र पोखरेलनिकट हरि रिजालले दाबी गरेका छन् । उद्घाटनसत्रको समापन भएको छ । अब बन्दसत्र चल्नेछ ।